na chhuTa hath se yak lahza gareban mera

na chhuTā haath se yak lahza garebāñ merā

chashm-e-tar hī pe rahā gosha-e-dāmāñ merā

jis taraf guzre kare rū-e-zamīñ ko gulzār

sair-e-gulshan se phire jab gul-e-ḳhandāñ merā

kheleñ aapas meñ parī-chehra jahāñ zulfeñ khol

kaun pūchhe hai vahāñ hāl-e-pareshāñ merā

baḳht haiñ shor ye apne hī ki vo naushīñ lab

auroñ kā chashma-e-haivāñ hai namak-dāñ merā

auroñ kī āñkhoñ ko dekhūñ huuñ maiñ dīdār-nasīb

banā rone ko yahī dīda-e-giryāñ merā

duur us lab se jo guzre hai dil-e-pur-ḳhūñ par

jaane merā hī jigar aur ye dandāñ merā

be-ajal martā rahā ishq meñ us ke umr bhar

kahūñ kis muñh pe maiñ 'hasrat' vo hai jānāñ merā

na chhuTa hath se yak lahza gareban mera

chashm-e-tar hi pe raha gosha-e-daman mera

jis taraf guzre kare ru-e-zamin ko gulzar

sair-e-gulshan se phire jab gul-e-KHandan mera

khelen aapas mein pari-chehra jahan zulfen khol

kaun puchhe hai wahan haal-e-pareshan mera

baKHt hain shor ye apne hi ki wo naushin lab

auron ka chashma-e-haiwan hai namak-dan mera

auron ki aankhon ko dekhun hun main didar-nasib

bana rone ko yahi dida-e-giryan mera

dur us lab se jo guzre hai dil-e-pur-KHun par

jaane mera hi jigar aur ye dandan mera

be-ajal marta raha ishq mein us ke umr bhar

kahun kis munh pe main 'hasrat' wo hai jaanan mera