na is tarah koi aaya hai aur na aata hai

na is tarah koī aayā hai aur na aatā hai

magar vo hai ki musalsal diye jalātā hai

kabhī safar kabhī raḳht-e-safar gañvātā hai

phir is ke baad koī rāsta banātā hai

ye log ishq meñ sachche nahīñ haiñ varna hijr

na ibtidā na kahīñ intihā meñ aatā hai

ye kaun hai jo dikhā.ī nahīñ diyā ab tak

aur ek umr se apnī taraf bulātā hai

vo kaun thā maiñ jise rāste meñ chhoḌ aayā

ye kaun hai jo mire saath saath aatā hai

vahī tasalsul-e-auqāt toḌ degā ki jo

dar-e-ufuq pe shab-o-roz ko milātā hai

jo āsmān se rāteñ utārtā hai 'salīm'

vahī zamīñ se kabhī āftāb uThātā hai

na is tarah koi aaya hai aur na aata hai

magar wo hai ki musalsal diye jalata hai

kabhi safar kabhi raKHt-e-safar ganwata hai

phir is ke baad koi rasta banata hai

ye log ishq mein sachche nahin hain warna hijr

na ibtida na kahin intiha mein aata hai

ye kaun hai jo dikhai nahin diya ab tak

aur ek umr se apni taraf bulata hai

wo kaun tha main jise raste mein chhoD aaya

ye kaun hai jo mere sath sath aata hai

wahi tasalsul-e-auqat toD dega ki jo

dar-e-ufuq pe shab-o-roz ko milata hai

jo aasman se raaten utarta hai 'salim'

wahi zamin se kabhi aaftab uThata hai