na sah sakunga gham-e-zat go akela main

na sah sakūñgā ġham-e-zāt go akelā maiñ

kahāñ tak aur kisī par karūñ bharosā maiñ

hunar vo hai ki jiyūñ chāñd ban kar āñkhoñ meñ

rahūñ diloñ meñ qayāmat kī tarah barpā maiñ

vo rañg rañg ke chhīñTe paḌe ki is ke ba.ad

kabhī na phir na.e kapḌe pahan ke niklā maiñ

na sirf ye ki zamāna hī mujh pe hañstā hai

banā huā huuñ ḳhud apne liye tamāshā maiñ

mujhe sameTne aayā bhī thā koī jis vaqt

dayār o dasht o daman meñ bikhar rahā thā maiñ

ye kis tarah kī mohabbat thī kaisā rishta thā

ki hijr ne na rulāyā use na taḌpā maiñ

paḌā rahūñ na qafas meñ to kyā karūñ āḳhir

ki dekhtā huuñ bahut duur tak dhuñdlakā maiñ

bahut malūl huuñ ai sūrat-āshnā tujh se

ki tere sāmne kyuuñ aa gayā sarāpā maiñ

yahī nahīñ ki tujhī ko na thī umiid aisī

mujhe bhī ilm nahīñ thā ki ye karūñgā maiñ

maiñ ḳhaak hī se banā thā tū kaash yuuñ bantā

ki us ke haath se girte hī TuuT jaatā maiñ

na sah sakunga gham-e-zat go akela main

kahan tak aur kisi par karun bharosa main

hunar wo hai ki jiyun chand ban kar aankhon mein

rahun dilon mein qayamat ki tarah barpa main

wo rang rang ke chhinTe paDe ki is ke baad

kabhi na phir nae kapDe pahan ke nikla main

na sirf ye ki zamana hi mujh pe hansta hai

bana hua hun KHud apne liye tamasha main

mujhe sameTne aaya bhi tha koi jis waqt

dayar o dasht o daman mein bikhar raha tha main

ye kis tarah ki mohabbat thi kaisa rishta tha

ki hijr ne na rulaya use na taDpa main

paDa rahun na qafas mein to kya karun aaKHir

ki dekhta hun bahut dur tak dhundlaka main

bahut malul hun ai surat-ashna tujh se

ki tere samne kyun aa gaya sarapa main

yahi nahin ki tujhi ko na thi umid aisi

mujhe bhi ilm nahin tha ki ye karunga main

main KHak hi se bana tha tu kash yun banta

ki us ke hath se girte hi TuT jata main