naghma-e-ishq-e-butan aur zara aahista

naġhma-e-ishq-e-butāñ aur zarā āhista

zikr-e-nāzuk-badanāñ aur zarā āhista

mere mahbūb kī yādoñ ke bhaḌakte haiñ charāġh

ai nasīm-e-guzarāñ aur zarā āhista

jis taraf se vo guzarte haiñ sadā aatī hai

ai qarār-e-dil-o-jāñ aur zarā āhista

dil har ik gaam pe logoñ ne bichhā rakkhe haiñ

aur ai sarv-e-ravāñ aur zarā āhista

kūcha-e-dost meñ āhista-ravī ke bā-vasf

dil ye kahtā hai yaañ aur zarā āhista

un pe mauj-e-nafas-e-gul bhī girāñ guzre hai

pursish-e-ġham-zadagāñ aur zarā āhista

bāñdh kar ahd-e-vafā koī gayā hai mujh se

ai mirī umr-e-ravāñ aur zarā āhista

kam ibādat se nahīñ zikr butoñ kā bhī 'azīz'

baare tausīf-e-butāñ aur zarā āhista

naghma-e-ishq-e-butan aur zara aahista

zikr-e-nazuk-badanan aur zara aahista

mere mahbub ki yaadon ke bhaDakte hain charagh

ai nasim-e-guzaran aur zara aahista

jis taraf se wo guzarte hain sada aati hai

ai qarar-e-dil-o-jaan aur zara aahista

dil har ek gam pe logon ne bichha rakkhe hain

aur ai sarw-e-rawan aur zara aahista

kucha-e-dost mein aahista-rawi ke ba-wasf

dil ye kahta hai yan aur zara aahista

un pe mauj-e-nafas-e-gul bhi giran guzre hai

pursish-e-gham-zadagan aur zara aahista

bandh kar ahd-e-wafa koi gaya hai mujh se

ai meri umr-e-rawan aur zara aahista

kam ibaadat se nahin zikr buton ka bhi 'aziz'

bare tausif-e-butan aur zara aahista