nazar aate nahin hain bahr mein hum

nazar aate nahīñ haiñ bahr meñ ham

ya.anī rahte haiñ apnī lahr meñ ham

khul rahe haiñ bañdhe hue pul se

ghul rahe haiñ ḳhud apne zahr meñ ham

hai qafas bhī tilism-ḳhāna-e-ḳhvāb

aa ga.e ek aur shahr meñ ham

kisī zindāñ meñ sochnā hai abas

dahr ham meñ hai yā ki dahr meñ ham

ho ga.ī raat so leñ kuchh sardār

jaag uTTheñge pichhle pahr meñ ham

ham haiñ maqtal meñ aur qātil ġham

kaise laa.e ga.e the qahr meñ ham

ab jagā.egī yaad us kī 'zafar'

chhoḌ aa.e jo niiñd nahr meñ ham

nazar aate nahin hain bahr mein hum

yani rahte hain apni lahr mein hum

khul rahe hain bandhe hue pul se

ghul rahe hain KHud apne zahr mein hum

hai qafas bhi tilism-KHana-e-KHwab

aa gae ek aur shahr mein hum

kisi zindan mein sochna hai abas

dahr hum mein hai ya ki dahr mein hum

ho gai raat so len kuchh sardar

jag uTThenge pichhle pahr mein hum

hum hain maqtal mein aur qatil gham

kaise lae gae the qahr mein hum

ab jagaegi yaad us ki 'zafar'

chhoD aae jo nind nahr mein hum