nit-nae naqsh se baatin ko sajata hua main

nit-na.e naqsh se bātin ko sajātā huā maiñ

apne zāhir ke ḳhad-o-ḳhāl miTātā huā maiñ

lahza lahza ye fidā hotī huī mujh pe hayāt

aur har aan nazar us se churātā huā maiñ

jaane kis rut meñ khileñge yahāñ ta.abīr ke phuul

sochtā rahtā huuñ ab ḳhvāb ugātā huā maiñ

har ghaḌī baḌhtī huī tishna-labī ishq tirī!

dil ke riste hue zaḳhmoñ se bujhātā huā maiñ

roz hotā huā mujh meñ kisī ḳhvāhish kā janam

roz hī qabr na.ī ḳhud meñ banātā huā maiñ

rahrav-e-shauq! karo yuuñ! mire pīchhe aao

aao chaltā huuñ tumheñ raah dikhātā huā maiñ

ab kahāñ vaise haiñ idrāk ke lamhāt nasīb

yaad meñ kho ke tirī ḳhud ko vo paatā huā maiñ

aaj bhī yaad haiñ 'sārim' ko manāzir saare

har adā par vo tirī jaan se jaatā huā maiñ

nit-nae naqsh se baatin ko sajata hua main

apne zahir ke KHad-o-KHal miTata hua main

lahza lahza ye fida hoti hui mujh pe hayat

aur har aan nazar us se churaata hua main

jaane kis rut mein khilenge yahan tabir ke phul

sochta rahta hun ab KHwab ugata hua main

har ghaDi baDhti hui tishna-labi ishq tiri!

dil ke riste hue zaKHmon se bujhata hua main

roz hota hua mujh mein kisi KHwahish ka janam

roz hi qabr nai KHud mein banata hua main

rahraw-e-shauq! karo yun! mere pichhe aao

aao chalta hun tumhein rah dikhata hua main

ab kahan waise hain idrak ke lamhat nasib

yaad mein kho ke teri KHud ko wo pata hua main

aaj bhi yaad hain 'sarim' ko manazir sare

har ada par wo teri jaan se jata hua main