pechaak-e-umr apne sanwar aaine ke sath

pechāk-e-umr apne sañvār aa.ine ke saath

baaqī ke chaar din bhī guzār aa.ine ke saath

hāsid bahut hai pal meñ huvaidā kare ḳhizāñ

itnā na lag ke baiTh bahār aa.ine ke saath

pathrā ga.e haiñ log tajallī se husn kī

thoḌā sā Daal ruḳh pe ġhubār aa.ine ke saath

kartā hai aks zer-o-zabar nā-murād vaqt

jab ghūmtā hai ulTe madār aa.ine ke saath

paayā na kuchh ḳhalā ke sivā aks-e-hairatī

guzrā thā ār-pār hazār aa.ine ke saath

ma.adūm ho rahe haiñ ḳhad-o-ḳhāl kis sabab

guft-o-shunīd kar mire yaar aa.ine ke saath

vīrān sā khañDar hai magar sair ke liye

lagtī hai ik tavīl qatār aa.ine ke saath

ma.akūs o aks kaise haiñ paivast dekh tū

ā.īna kar rahā hai siñghār aa.ine ke saath

pechaak-e-umr apne sanwar aaine ke sath

baqi ke chaar din bhi guzar aaine ke sath

hasid bahut hai pal mein huwaida kare KHizan

itna na lag ke baiTh bahaar aaine ke sath

pathra gae hain log tajalli se husn ki

thoDa sa Dal ruKH pe ghubar aaine ke sath

karta hai aks zer-o-zabar na-murad waqt

jab ghumta hai ulTe madar aaine ke sath

paya na kuchh KHala ke siwa aks-e-hairati

guzra tha aar-par hazar aaine ke sath

madum ho rahe hain KHad-o-KHal kis sabab

guft-o-shunid kar mere yar aaine ke sath

viran sa khanDar hai magar sair ke liye

lagti hai ek tawil qatar aaine ke sath

makus o aks kaise hain paiwast dekh tu

aaina kar raha hai singhaar aaine ke sath