rakh ke Dher pe kya shoala-bayani karte

raakh ke Dher pe kyā sho.ala-bayānī karte

ek qisse kī bhalā kitnī kahānī karte

husn itnā thā ki mumkin hī na thī ḳhud-nigarī

ek imkān kī kab tak nigarānī karte

shola-e-jāñ ko bujhāte yūñhī qatra qatra

ḳhud ko ham aag banāte tujhe paanī karte

phuul sā tujh ko mahaktā huā rakhte shab bhar

apne sāñsoñ se tujhe raat kī raanī karte

naddiyāñ dekheñ to bas sharm se paanī ho jaa.eñ

chashm-e-ḳhūñ-basta se paidā vo ravānī karte

sab se kahte ki ye qissa hai purānā sāhab

aah kī aañch se tasvīr purānī karte

dar-o-dīvār badalne meñ kahāñ kī mushkil

ghar jo hotā to bhalā naql-e-makānī karte

koī aa jaatā kabhī yūñhī agar dil ke qarīb

ham tirā zikr pa.e-yād-dahānī karte

sach to ye hai ki tire hijr kā ab rañj nahīñ

kyā dikhāve ke liye ashk-fishānī karte

dil ko har lahza hī dī aql pe ham ne tarjīh

yār-e-jānī ko kahāñ dushman-e-jānī karte

shab isī tarah basar hotī hai merī 'irfān'

harf-e-ḳhush-rañg ko andoh-e-ma.ānī karte

rakh ke Dher pe kya shoala-bayani karte

ek qisse ki bhala kitni kahani karte

husn itna tha ki mumkin hi na thi KHud-nigari

ek imkan ki kab tak nigarani karte

shola-e-jaan ko bujhate yunhi qatra qatra

KHud ko hum aag banate tujhe pani karte

phul sa tujh ko mahakta hua rakhte shab bhar

apne sanson se tujhe raat ki rani karte

naddiyan dekhen to bas sharm se pani ho jaen

chashm-e-KHun-basta se paida wo rawani karte

sab se kahte ki ye qissa hai purana sahab

aah ki aanch se taswir purani karte

dar-o-diwar badalne mein kahan ki mushkil

ghar jo hota to bhala naql-e-makani karte

koi aa jata kabhi yunhi agar dil ke qarib

hum tera zikr pae-yaad-dahani karte

sach to ye hai ki tere hijr ka ab ranj nahin

kya dikhawe ke liye ashk-fishani karte

dil ko har lahza hi di aql pe hum ne tarjih

yar-e-jaani ko kahan dushman-e-jaani karte

shab isi tarah basar hoti hai meri 'irfan'

harf-e-KHush-rang ko andoh-e-maani karte