rasta de ai hujum-e-shahr ghar jaenge hum

rāsta de ai hujūm-e-shahr ghar jā.eñge ham

aur tere darmiyāñ Thahre to mar jā.eñge ham

ḳhush-ḳhirām āñkhoñ meñ us kā 'aks utartā hī nahīñ

ab ke us ke paas le kar chashm-e-tar jā.eñge ham

vo nahīñ to dhuul hī mil jaa.e us ke paañv kī

us galī meñ ab ke ban kar rahguzar jā.eñge ham

shāyad us dahlīz par rakkhā ho ab bhī vo charāġh

vāpsī kī raah meñ phir us ke ghar jā.eñge ham

'umr bhar paḌhte raheñge ik yahī aḳhbār-e-husn

aur saare sānehoñ se be-ḳhabar jā.eñge ham

jism kā kuuza hai apnā aur na ye dariyā-e-jāñ

jo lagā legā laboñ se us meñ bhar jā.eñge ham

'ishq ne roz-e-azal hī kar diyā thā faisla

phir kahāñ duniyā ke kahne se sudhar jā.eñge ham

'farhat-ehsās' apne shāgirdoñ meñ shāmil kar hameñ

varna is duniyā se yūñhī be-hunar jā.eñge ham

rasta de ai hujum-e-shahr ghar jaenge hum

aur tere darmiyan Thahre to mar jaenge hum

KHush-KHiram aankhon mein us ka 'aks utarta hi nahin

ab ke us ke pas le kar chashm-e-tar jaenge hum

wo nahin to dhul hi mil jae us ke panw ki

us gali mein ab ke ban kar rahguzar jaenge hum

shayad us dahliz par rakkha ho ab bhi wo charagh

wapsi ki rah mein phir us ke ghar jaenge hum

'umr bhar paDhte rahenge ek yahi aKHbar-e-husn

aur sare sanehon se be-KHabar jaenge hum

jism ka kuza hai apna aur na ye dariya-e-jaan

jo laga lega labon se us mein bhar jaenge hum

'ishq ne roz-e-azal hi kar diya tha faisla

phir kahan duniya ke kahne se sudhar jaenge hum

'farhat-ehsas' apne shagirdon mein shamil kar hamein

warna is duniya se yunhi be-hunar jaenge hum