rah-e-suluk mein bal Dalne pe rahta hai

rah-e-sulūk meñ bal Dālne pe rahtā hai

lahū kā khel ḳhalal Dālne pe rahtā hai

ye dekhtā nahīñ buniyād meñ haiñ haDDiyāñ kyā

har ek apnā mahal Dālne pe rahtā hai

muhim pe roz nikaltā hai tājir-e-bārūd

aur ek ḳhauf-e-ajal Dālne pe rahtā hai

aur ek haath milātā hai zahr paanī meñ

aur ek haath kañval Dālne pe rahtā hai

aur ek haath khilātā hai shāḳh par koñpal

aur ek haath masal Dālne pe rahtā hai

aur ek haath uThātā hai parcham-e-āvāz

aur ek haath kuchal Dālne pe rahtā hai

aur ek haath baḌhātā hai irtiqā kā sarūp

aur ek haath badal Dālne pe rahtā hai

sab ek radd-e-amal kā amal hai aur nahīñ

jo ek radd-e-amal Dālne pe rahtā hai

rujūa lā-mutazalzal hai jo masā.il kā

dimāġh meñ koī hal Dālne pe rahtā hai

ham apnā radd-o-badal Daal dete haiñ us meñ

vo apnā radd-o-badal Dālne pe rahtā hai

miyān-e-sābit-o-sayyār irtikāz mirā

abad ke biich azal Dālne pe rahtā hai

ye sub.h-o-shām pe phailā huā mirā honā

ye mere aaj meñ kal Dālne pe rahtā hai

har ek rāhguzar se guzartā hai sūraj

aur ik shuā-e-aTal Dālne pe rahtā hai

pasand aate nahīñ sīdhe-sādhe log use

vo apne māthe pe bil Dālne pe rahtā hai

ravish koī bhī ziyāda use nahīñ bhātī

vo apnā aap badal Dālne pe rahtā hai

'naved' tā.ir-e-lāhautī kā junūñ to nahīñ

jo Daal Daal pe phal Dālne pe rahtā hai

rah-e-suluk mein bal Dalne pe rahta hai

lahu ka khel KHalal Dalne pe rahta hai

ye dekhta nahin buniyaad mein hain haDDiyan kya

har ek apna mahal Dalne pe rahta hai

muhim pe roz nikalta hai tajir-e-barud

aur ek KHauf-e-ajal Dalne pe rahta hai

aur ek hath milata hai zahr pani mein

aur ek hath kanwal Dalne pe rahta hai

aur ek hath khilata hai shaKH par konpal

aur ek hath masal Dalne pe rahta hai

aur ek hath uThata hai parcham-e-awaz

aur ek hath kuchal Dalne pe rahta hai

aur ek hath baDhata hai irtiqa ka sarup

aur ek hath badal Dalne pe rahta hai

sab ek radd-e-amal ka amal hai aur nahin

jo ek radd-e-amal Dalne pe rahta hai

rujua la-mutazalzal hai jo masail ka

dimagh mein koi hal Dalne pe rahta hai

hum apna radd-o-badal Dal dete hain us mein

wo apna radd-o-badal Dalne pe rahta hai

miyan-e-sabit-o-sayyar irtikaz mera

abad ke bich azal Dalne pe rahta hai

ye subh-o-sham pe phaila hua mera hona

ye mere aaj mein kal Dalne pe rahta hai

har ek rahguzar se guzarta hai suraj

aur ek shua-e-aTal Dalne pe rahta hai

pasand aate nahin sidhe-sadhe log use

wo apne mathe pe bil Dalne pe rahta hai

rawish koi bhi ziyaada use nahin bhati

wo apna aap badal Dalne pe rahta hai

'nawed' tair-e-lahauti ka junun to nahin

jo Dal Dal pe phal Dalne pe rahta hai