rang se pairahan-e-sada hinai ho jae

rañg se pairahan-e-sāda hinā.ī ho jaa.e

pahne zanjīr jo chāñdī kī talā.ī ho jaa.e

ḳhud-faroshī ko jo tū nikle ba-shakl-e-yūsuf

ai sanam terī ḳharīdār ḳhudā.ī ho jaa.e

ḳhat-e-to.am kī tarah āshiq o māshūq haiñ ek

donoñ bekār haiñ jis vaqt judā.ī ho jaa.e

tañgi-e-gosha-e-uzlat hai bayāñ se bāhar

nahīñ imkān ki chyūñTī kī samā.ī ho jaa.e

yahī har uzv se aatī hai sadā furqat meñ

vaqt ye vo hai judā bhaa.ī se bhaa.ī ho jaa.e

apnī hī aag meñ ai 'barq' jalā jaatā huuñ

unsur-e-ḳhāk ho turbat jo laḌā.ī ho jaa.e

rang se pairahan-e-sada hinai ho jae

pahne zanjir jo chandi ki talai ho jae

KHud-faroshi ko jo tu nikle ba-shakl-e-yusuf

ai sanam teri KHaridar KHudai ho jae

KHat-e-toam ki tarah aashiq o mashuq hain ek

donon bekar hain jis waqt judai ho jae

tangi-e-gosha-e-uzlat hai bayan se bahar

nahin imkan ki chyunTi ki samai ho jae

yahi har uzw se aati hai sada furqat mein

waqt ye wo hai juda bhai se bhai ho jae

apni hi aag mein ai 'barq' jala jata hun

unsur-e-KHak ho turbat jo laDai ho jae