samajhte kya hain in do chaar rangon ko udhar wale

samajhte kyā haiñ in do chaar rañgoñ ko udhar vaale

tarañg aa.ī to manzar hī badal deñge nazar vaale

isī par ḳhush haiñ ki ik dūsre ke saath rahte haiñ

abhī tanhā.ī kā matlab nahīñ samjhe haiñ ghar vaale

sitam ke vaar haiñ to kyā qalam ke dhaar bhī to haiñ

guzāra ḳhuub kar lete haiñ izzat se hunar vaale

koī sūrat nikaltī hī nahīñ hai baat hone kī

vahāñ zo.am-e-ḳhudā-vandī yahāñ jazbe bashar vaale

mafā.īlun kā paimāna bahut hī tañg hotā hai

jabhī to sher ham kahte nahīñ haiñ dil jigar vaale

gharoñ meñ the to vus.at dasht kī ham ko bulātī thī

magar ab dasht meñ aa.e to yaad aate haiñ ghar vaale

jo mustaqbil se pur-ummīd ho vo shā.er-e-mutlaq

'shujā-ḳhāvar' se apnī fikr kī islāh karvā le

samajhte kya hain in do chaar rangon ko udhar wale

tarang aai to manzar hi badal denge nazar wale

isi par KHush hain ki ek dusre ke sath rahte hain

abhi tanhai ka matlab nahin samjhe hain ghar wale

sitam ke war hain to kya qalam ke dhaar bhi to hain

guzara KHub kar lete hain izzat se hunar wale

koi surat nikalti hi nahin hai baat hone ki

wahan zoam-e-KHuda-wandi yahan jazbe bashar wale

mafailun ka paimana bahut hi tang hota hai

jabhi to sher hum kahte nahin hain dil jigar wale

gharon mein the to wusat dasht ki hum ko bulati thi

magar ab dasht mein aae to yaad aate hain ghar wale

jo mustaqbil se pur-ummid ho wo shaer-e-mutlaq

'shuja-KHawar' se apni fikr ki islah karwa le