tum se ab kaamyab aur hi hai

tum se ab kāmyāb aur hī hai

aah ham par azaab aur hī hai

us ko ā.īna kab pahuñchtā hai

husn kī āb-o-tāb aur hī hai

riñd vaa.iz se kyuuñ ki sarbar ho

us kī chhū, kī kitāb aur hī hai

hijr bhī kam nahīñ hai dozaḳh se

is safar kā azaab aur hī hai

us ko lagtī hai kab koī talvār

teġh-e-abrū kī aab aur hī hai

yuuñ to hai surḳh yaar kā chehrā

par piye jab sharāb aur hī hai

mujh ko is niiñd se nahīñ ārām

mujh ko rāhat kā ḳhvāb aur hī hai

bahs-e-ilmī se kab haiñ ye qaa.il

jāhiloñ kā javāb aur hī hai

yaad meñ terī zulf-o-kākul kī

dil ke ta.iiñ pech-o-tāb aur hī hai

us sitamgar kā mujh pe har saa.at

jaur-o-zulm-o-azāb aur hī hai

kis tarah se guhar kahūñ 'tābāñ'

us ke dandāñ meñ aab aur hī hai

tum se ab kaamyab aur hi hai

aah hum par azab aur hi hai

us ko aaina kab pahunchta hai

husn ki aab-o-tab aur hi hai

rind waiz se kyun ki sarbar ho

us ki chhu, ki kitab aur hi hai

hijr bhi kam nahin hai dozaKH se

is safar ka azab aur hi hai

us ko lagti hai kab koi talwar

tegh-e-abru ki aab aur hi hai

yun to hai surKH yar ka chehra

par piye jab sharab aur hi hai

mujh ko is nind se nahin aaram

mujh ko rahat ka KHwab aur hi hai

bahs-e-ilmi se kab hain ye qail

jahilon ka jawab aur hi hai

yaad mein teri zulf-o-kakul ki

dil ke tain pech-o-tab aur hi hai

us sitamgar ka mujh pe har saat

jaur-o-zulm-o-azab aur hi hai

kis tarah se guhar kahun 'taban'

us ke dandan mein aab aur hi hai