uTh gai uski nazar main jo muqabil se uTha

uTh ga.ī us kī nazar maiñ jo muqābil se uThā

varna uThne ke liye ġhair bhī mahfil se uThā

baiTh kar lutf na tū sāya-e-bātil se uThā

chal ke ārām uThānā hai to manzil se uThā

aa ke mahfil meñ tirī kaun mire dil se uThā

koī uTThā bhī mirī tarah to mushkil se uThā

saath aatā hai to lahroñ ke thapeḌe mat gin

mauj se lutf uThānā hai to sāhil se uThā

haath meñ jaan uThānā to baḌī baat nahīñ

koī patthar koī kāñTā rah-e-manzil se uThā

qurb-e-sāhil ke takabbur meñ jo kashtī Duubī

koī chhoTā sā babūla bhī na sāhil se uThā

be-dilī haa.e tamannā ki na duniyā hai na diiñ

jis taraf tujh ko uThānā hai qadam dil se uThā

vo jo nau-vārid-e-ulfat haiñ unheñ kyā ma.alūm

kis liye aaj maiñ sañg-e-dar-e-qātil se uThā

shaiḳh par haath uThāne ke nahīñ ham qaa.el

haath uThāne kī jo Thānī hai to bātil se uThā

aaj us kufr-e-sarāpā ne sañvāre gesū

aaj bikhrā huā parda ruḳh-e-bātil se uThā

'shād' ik rahbar-e-makkār se rahzan achchhā

koī nuqsān uThānā hai to jāhil se uThā

uTh gai us ki nazar main jo muqabil se uTha

warna uThne ke liye ghair bhi mahfil se uTha

baiTh kar lutf na tu saya-e-baatil se uTha

chal ke aaram uThana hai to manzil se uTha

aa ke mahfil mein teri kaun mere dil se uTha

koi uTTha bhi meri tarah to mushkil se uTha

sath aata hai to lahron ke thapeDe mat gin

mauj se lutf uThana hai to sahil se uTha

hath mein jaan uThana to baDi baat nahin

koi patthar koi kanTa rah-e-manzil se uTha

qurb-e-sahil ke takabbur mein jo kashti Dubi

koi chhoTa sa babula bhi na sahil se uTha

be-dili hae tamanna ki na duniya hai na din

jis taraf tujh ko uThana hai qadam dil se uTha

wo jo nau-warid-e-ulfat hain unhen kya malum

kis liye aaj main sang-e-dar-e-qatil se uTha

shaiKH par hath uThane ke nahin hum qael

hath uThane ki jo Thani hai to baatil se uTha

aaj us kufr-e-sarapa ne sanware gesu

aaj bikhra hua parda ruKH-e-baatil se uTha

'shad' ek rahbar-e-makkar se rahzan achchha

koi nuqsan uThana hai to jahil se uTha