waqt sakin hai main guzar raha hun

vaqt sākin hai maiñ guzar rahā huuñ

maiñ to is āgahī se mar rahā huuñ

bol kar jo mujhe dabā rahā hai

us kī āvāz se ubhar rahā huuñ

aa.ina mujh ko dekh kar chup hai

jaane maiñ kis se baat kar rahā huuñ

maiñ ye samjhā thā vo Thahar rahā hai

ve ye samjhā thā maiñ Thahar rahā huuñ

ik parinda banāyā kāġhaz par

aur ab us ke par katar rahā huuñ

us ne va.ada nahīñ liyā mujh se

aur kahtā hai maiñ mukar rahā huuñ

terī tasvīr nā-mukammal hai

maiñ abhī is meñ rañg bhar rahā huuñ

jo tujhe jāntā nahīñ 'momin'

vo samajhtā hai tujh se Dar rahā huuñ

waqt sakin hai main guzar raha hun

main to is aagahi se mar raha hun

bol kar jo mujhe daba raha hai

us ki aawaz se ubhar raha hun

aaina mujh ko dekh kar chup hai

jaane main kis se baat kar raha hun

main ye samjha tha wo Thahar raha hai

we ye samjha tha main Thahar raha hun

ek parinda banaya kaghaz par

aur ab us ke par katar raha hun

us ne wada nahin liya mujh se

aur kahta hai main mukar raha hun

teri taswir na-mukammal hai

main abhi is mein rang bhar raha hun

jo tujhe jaanta nahin 'momin'

wo samajhta hai tujh se Dar raha hun