wo dhyan ki rahon mein jahan hum ko milega

vo dhyān kī rāhoñ meñ jahāñ ham ko milegā

bas ek chhalāve sā koī dam ko milegā

anjānī zamīnoñ se mujhe degā sadā vo

nairañg-e-navā-shauq kī sargam ko milegā

maiñ ajnabī ho jā.ūñgā ḳhud apnī nazar meñ

jis dam vo mire dīda-e-pur-nam ko milegā

jo naqsh ki arzhañg-e-zamāna meñ nahīñ hai

us dil ke dhaḌakte hue albam ko milegā

rut vasl kī aa.egī chalī jā.egī lekin

kuchh rañg to yuuñ hijr ke mausam ko milegā

ye dil ki hai Thukrāyā huā saare jahāñ kā

ghar ek yahī hai jo tire ġham ko milegā

patthar hai to Thokar meñ rahe pā-e-talab kī

dil hai to usī turra-e-pur-ḳham ko milegā

gar shīsha-e-mai hai to ho auroñ ko mubārak

hai jām-e-jahāñ-bīñ to faqat jam ko milegā

lahrāte raheñge chamanistāñ meñ sharāre

ḳhaar o ḳhas o ḳhāshāk hī aalam ko milegā

mālūm hai 'urfī' jo hai qismat meñ hamārī

sahrā hī koī girya-e-shabnam ko milegā

wo dhyan ki rahon mein jahan hum ko milega

bas ek chhalawe sa koi dam ko milega

anjaani zaminon se mujhe dega sada wo

nairang-e-nawa-shauq ki sargam ko milega

main ajnabi ho jaunga KHud apni nazar mein

jis dam wo mere dida-e-pur-nam ko milega

jo naqsh ki arzhang-e-zamana mein nahin hai

us dil ke dhaDakte hue albam ko milega

rut wasl ki aaegi chali jaegi lekin

kuchh rang to yun hijr ke mausam ko milega

ye dil ki hai Thukraya hua sare jahan ka

ghar ek yahi hai jo tere gham ko milega

patthar hai to Thokar mein rahe pa-e-talab ki

dil hai to usi turra-e-pur-KHam ko milega

gar shisha-e-mai hai to ho auron ko mubarak

hai jam-e-jahan-bin to faqat jam ko milega

lahraate rahenge chamanistan mein sharare

KHar o KHas o KHashak hi aalam ko milega

malum hai 'urfi' jo hai qismat mein hamari

sahra hi koi girya-e-shabnam ko milega