wo jin ki lau se hazaron charagh jalte the

vo jin kī lau se hazāroñ charāġh jalte the

charāġh bād-e-fanā ne bujhā.e haiñ kyā kyā

na tāb-e-dīd na be-dekhe chain hī aa.e

hamāre haal pe vo muskurā.e haiñ kyā kyā

razā o sabr o qanā.at tavāzo o taslīm

falak ne ham ko ḳhasā.il sikhā.e haiñ kyā kyā

laraz gayā hai jahāñ dast-e-kātib-e-taqdīr

hamārī ziist meñ lamhāt aa.e haiñ kyā kyā

naqāb uThāo to qissa hī ḳhatm ho jaa.e

tumhāre parda ne fitne uThā.e haiñ kyā kyā

zamāna halkā sā ḳhāka na le sakā jin kā

nuqūsh dast-e-qazā ne miTā.e haiñ kyā kyā

ye panj-shīl ye jamhūriyat ye rāy-e-avām

ye ahl-e-zar ne khilaune banā.e haiñ kyā kyā

balā-e-jāñ huī 'vāsif' kī be-gunāhī bhī

zarā sī baat meñ ilzām aa.e haiñ kyā kyā

wo jin ki lau se hazaron charagh jalte the

charagh baad-e-fana ne bujhae hain kya kya

na tab-e-did na be-dekhe chain hi aae

hamare haal pe wo muskurae hain kya kya

raza o sabr o qanaat tawazo o taslim

falak ne hum ko KHasail sikhae hain kya kya

laraz gaya hai jahan dast-e-katib-e-taqdir

hamari zist mein lamhat aae hain kya kya

naqab uThao to qissa hi KHatm ho jae

tumhaare parda ne fitne uThae hain kya kya

zamana halka sa KHaka na le saka jin ka

nuqush dast-e-qaza ne miTae hain kya kya

ye panj-shil ye jamhuriyat ye ray-e-awam

ye ahl-e-zar ne khilaune banae hain kya kya

bala-e-jaan hui 'wasif' ki be-gunahi bhi

zara si baat mein ilzam aae hain kya kya