wo jis ki justuju-e-did mein pathra gain aankhen

vo jis kī justujū-e-dīd meñ pathrā ga.iiñ āñkheñ

nazar ke sāmne ik din sar-e-mahfil bhī aa.egā

ye kyā shikva ki koī chāhne vaalā nahīñ miltā

karam par tum jo ho maa.il koī saa.il bhī aa.egā

ye tūfāñ-ḳhez maujeñ ye thapeḌe baad o bārāñ ke

safīne ko yūñhī kahte raho sāhil bhī aa.egā

na ho māyūs hamdam paañv meñ laġhzish na aa jaa.e

nazar kuchh duur chal kar jāda-e-manzil bhī aa.egā

mohabbat apne dīvānoñ ko vīrāñ rakh nahīñ saktī

kisī kī justujū meñ ek din mahmil bhī aa.egā

ye mahfil aaj nā-ahloñ se jo māmūr hai 'vāsif'

usī mahfil meñ koī jauhar-e-qābil bhī aa.egā

wo jis ki justuju-e-did mein pathra gain aankhen

nazar ke samne ek din sar-e-mahfil bhi aaega

ye kya shikwa ki koi chahne wala nahin milta

karam par tum jo ho mail koi sail bhi aaega

ye tufan-KHez maujen ye thapeDe baad o baran ke

safine ko yunhi kahte raho sahil bhi aaega

na ho mayus hamdam panw mein laghzish na aa jae

nazar kuchh dur chal kar jada-e-manzil bhi aaega

mohabbat apne diwanon ko viran rakh nahin sakti

kisi ki justuju mein ek din mahmil bhi aaega

ye mahfil aaj na-ahlon se jo mamur hai 'wasif'

usi mahfil mein koi jauhar-e-qabil bhi aaega