yaad-e-firaq-e-yar tera shukriya bahut

yād-e-firāq-e-yār tirā shukriyā bahut

kal raat dil meñ dard hamāre uThā bahut

kal raat tere ġham ne lagā.ī thī phir sabīl

kal raat ham ne zahr-e-halāhal piyā bahut

muddat ke baad phir se mulāqāt ho ga.ī

ham ko udaas dekh ke royā kiyā bahut

shāyad nasīm terā badan chhū ke aa.ī thī

apnī sahar meñ rañg-e-qayāmat rahā bahut

'ajmal' na aap sā bhī koī saḳht-jāñ milā

dekheñ haiñ ham ne yuuñ to sitam-āshnā bahut

yaad-e-firaq-e-yar tera shukriya bahut

kal raat dil mein dard hamare uTha bahut

kal raat tere gham ne lagai thi phir sabil

kal raat hum ne zahr-e-halahal piya bahut

muddat ke baad phir se mulaqat ho gai

hum ko udas dekh ke roya kiya bahut

shayad nasim tera badan chhu ke aai thi

apni sahar mein rang-e-qayamat raha bahut

'ajmal' na aap sa bhi koi saKHt-jaan mila

dekhen hain hum ne yun to sitam-ashna bahut