yun ilaj-e-dil bimar kiya jaega

yuuñ ilāj-e-dil bīmār kiyā jā.egā

sharbat-e-dīd se sarshār kiyā jā.egā

hasrat-e-dīd meñ bīnā.ī gañvā baiThe jo

is se kaise tirā dīdār kiyā jā.egā

so rahā huuñ maiñ zamāne se tirā ḳhvāb liye

niiñd se kab mujhe bedār kiyā jā.egā

TuuT jā.egā bharam pariyoñ kī shahzādī kā

jab tire husn ko shahkār kiyā jā.egā

ḳhud-kushī kī ḳhabar aḳhbār kī surḳhī hogī

qatl mujh ko pas-e-dīvār kiyā jā.egā

maiñ sadāqat huuñ mujhe maut nahīñ aa.egī

vaise maslūb ka.ī baar kiyā jā.egā

in charāġhoñ ke tabassum meñ lahū hai merā

kab havāoñ ko ḳhabar-dār kiyā jā.egā

dil ke jazbāt javāñ aur bhī ho jā.eñge

merī rāhoñ ko jo dushvār kiyā jā.egā

hoñge sharminda manādir ke kalas bhī 'afzal'

kisī masjid ko jo mismār kiyā jā.egā

yun ilaj-e-dil bimar kiya jaega

sharbat-e-did se sarshaar kiya jaega

hasrat-e-did mein binai ganwa baiThe jo

is se kaise tera didar kiya jaega

so raha hun main zamane se tera KHwab liye

nind se kab mujhe bedar kiya jaega

TuT jaega bharam pariyon ki shahzadi ka

jab tere husn ko shahkar kiya jaega

KHud-kushi ki KHabar aKHbar ki surKHi hogi

qatl mujh ko pas-e-diwar kiya jaega

main sadaqat hun mujhe maut nahin aaegi

waise maslub kai bar kiya jaega

in charaghon ke tabassum mein lahu hai mera

kab hawaon ko KHabar-dar kiya jaega

dil ke jazbaat jawan aur bhi ho jaenge

meri rahon ko jo dushwar kiya jaega

honge sharminda manadir ke kalas bhi 'afzal'

kisi masjid ko jo mismar kiya jaega