نسائی شاعری کے حوالے سے فہمیدہ ریاض کی شاعری ایک نئے زاویہ کی جانب سفر کرتی ہوئی نظر آتی ہے جس میں عورت اپنے وجود کا بھر پور احساس کراتی ہے ۔فہمیدہ ریاض کی عورت کسی اورکے وجود کا سایہ نہیں بلکہ خو د ایک مکمل شخصیت کے طور پر سامنے آتی ہے ۔ انہوں نے روایتی نظریات سے کنار ہ کشی کر تے ہوئے نئی فضا میں سانس لیتے ہوئے ہی ’’مقابلہ ٔ حسن‘‘ جیسی نظم لکھی ۔ جس میں اس نظریہ کا بھر پور احتجاج ہے جو عورتوں کے لیے صدیوں سے استعمال ہوتا رہا ہے ۔اسی لیے فہمیدہ کے متعلق کہاجاتا ہے کہ وہ پہلی شاعرہ ہیں جس نے عورت کی آرکی ٹائیپ تشخص کواجاگر کیا ۔نسائی حسیت اور تانیثیت کے لیے انہوں نے آواز بلند کی، اس آواز میں یہ احساس ہوتا ہے کہ انہوں نے اپنے آنسوؤں کو ہنسی کے خوش رنگ دامن میں سلیقہ سے چھپایا بھی ہے ۔ یہ زیر لب مسکراہٹ ان کی اکثر ان کی تخلیقی تحریروں میں نظر آتی ہے ۔ یہ ان کا آخری شعری مجموعہ ہے ۔ اس مجموعہ میں تانیثی حسیت ، نسائی کیفیت ،سماجی مسائل ، سیاسی ظلم و جبر جیسے منفرد موضوعات پڑھنے کوملتے ہیں ۔ ان کے متعلق کہا جاتا ہے کہ شاعری میں متنوع لہجوں کی مالک تھیں جس کا احساس آپ کوبھی اس کے مطالعہ سے ہوگا ۔

نام فہمیدہ ریاض اور تخلص فہمیدہ ہے۔۲۸؍جولائی ۱۹۴۵ء کو میرٹھ میں پیدا ہوئیں۔ ایم اے تک تعلیم حاصل کی۔ لندن سے فلم ٹیکنک میں ڈپلوما حاصل کیا۔طالب علمی کے زمانے میں حیدرآباد میں پہلی نظم لکھی جو ’’فنون‘‘ میں چھپی۔ پہلا شعری مجموعہ ’’پتھر کی زبان‘‘ ۱۹۶۷ء میں منظر عام پر آیا۔’’بدن دریدہ‘‘ ۱۹۷۳ء میں ان کی شادی کے بعد انگلینڈ کے زمانہ قیام میں چھپا۔’’دھوپ‘‘ ان کا تیسرا مجموعۂ کلام ۱۹۷۶ء میں چھپا۔ کچھ عرصہ نیشنل بک کونسل ، اسلام آباد کی سربراہ رہیں۔جب جنرل ضیاء الحق برسر اقتدار آئے تو یہ ادبی مجلہ’’آواز‘‘ کی مدیرہ تھیں۔ ملٹری حکومت ان کو اچھی نگاہ سے نہیں دیکھتی تھی ۔ یہ ہندوستان چلی گئیں۔ ’’کیا تم پورا چاند نہ دیکھو گے‘‘۱۹۴۸ء میں ہندوستان میں ان کا شعری مجموعہ چھپا۔ ضیاء الحق کے انتقال کے بعد فہمیدہ ریاض پاکستان واپس آگئیں۔ ان کی دیگر تصانیف کے نام یہ ہیں:’حلقہ مری زنجیر کا ‘، ’ہم رکا ب‘، ’ادھورا آدمی‘، ’اپنا جرم ثابت ہے‘، ’ میں مٹی کی مورت ہوں‘، ’آدمی کی زندگی‘۔ ان کی محبوب صنف سخن نظم ہے ۔ بحوالۂ:پیمانۂ غزل(جلد دوم)،محمد شمس الحق،صفحہ:381