دلی ایک تاریخی شہر ہے۔ یہاں کئی راجاؤں، بادشاہوں نے حکومتیں کی ہیں۔ دہلی کی حکومتوں پر کئ کتابیں لکھی جاچکی ہیں۔دہلی کی شخصیتوں اور دہلی پر بھی کئ کتابیں لکھی گئی ہیں۔ اس کے باوجود بھی تشنگی باقی رہ جاتی ہے۔ کیونکہ شخصیات کی تاریخ کبھی مکمل نہیں ہو سکتی۔ زیر تبصرہ کتاب دہلی کی یاد گار شخصیتیں امداد صابری کی مایہ ناز تصنیف ہے۔امداد صابری ہندوستان کے نامور صحافی، مجاہد آزادی، کونسلر اور دلی کے سابق نائب ناظم (ڈپٹی میئر) تھے۔ انہیں تحریر و تقریر دونوں فن میں کمال حاصل تھا۔ ان کی مشہور تصنیفات میں تاریخ صحافت اردو، تاریخ آزاد ہند فوج، دہلی کی یادگار شخصیتیں اور فرنگیوں کا جال قابل ذکر ہیں۔ اس کتاب میں دہلی کے خوشنویس، اطبا،موسیقار، دہلی کی سرائیں، دہلی کی باولیاں، دہلی کے مساجد ، دہلی کے معززین، ادبی، صحافتی و علمی شخصیتوں کے حالات درج ہیں۔ جو مختلف اوقات میں لکھے گئے ہیں۔کتاب میں انتساب واصف کمال صدیقی کے نام ہے اور ساتھ ہی ابتدا ء میں مضمون کے ذریعے ان کی شخصیت کا خاکہ بھی کھینچا گیا ہے۔