مجموعہ میں شامل شاعری کئی ادوار کی تازگی محسوس کراتی ہیں، کچھ نئے دور کی تازگی عطا کرتی ہیں تو کچھ پرانے زمانے کی خوشبو سے آشنا کراتی ہیں۔ اس تازگی میں غوطہ لگائیں تو رومانویت کی لذت کا احساس ہوگا ۔ کسی بھی مجموعے کا یہ کمال ہوتا ہے کہ پڑھنے والے کو ماضی ، حال اور مستقل کی سیر کرادے جو اس مجموعے میں موجود ہے۔ "بستی بستی گھومنے والے" جیسی شاعری سے بھٹکتی زندگی اور "فردا" سے حال کو بہتر بنانے کی تلقین کا درس ملتا ہے۔ " انشا جی کیا بات بنے گی" کے تحت مسلسل چار نظموں کا ایک ہی عنوان " پھر تمہارا خط آیا" اور پانچویں کا عنوان "کیوں تمہارا خط آیا" ، سے خط ملنے کی خوشی کا دقیق اشارہ مجموعہ کے کمالِ استعارہ کو بتاتا ہے ۔ پوری کتاب میں جو غزلیں و نظمیں ہیں انتہائی سہل عروض پر ہیں، لہٰذا گنگنانے میں بڑا لطف آتا ہے۔ ایک بار پڑھ لیا جائے تو پھر گنگنانے کی ضمانت ہے۔ نیز ابن انشا کے یہاں ہندی الفاظ و تراکیب بہت ہی سلیقے سے استعمال ہوئے جس سے ایک طرح کی نغمگیں میں اضافہ ہوا ہے۔

نام شیر محمد اور تخلص انشا تھا۔۱۵؍جون ۱۹۲۷ء کو ضلع جالندھر میں ایک کاشت کار گھرانے میں پیدا ہوئے۔۱۹۴۶ء میں پنجاب یونیورسٹی سے بی اے کیا۔۱۹۴۷ء میں مہاجرین کے ساتھ پاکستان آگئے۔۱۹۵۳ء میں ایم اے(اردو) اردو کالج، کراچی سے کیا۔ابن انشا ایک بلند پایہ کالم نگار، مصنف ،مترجم، مزاح نگار اور شاعر تھے۔ ہندی ادب کا انھوں نے گہرا مطالعہ کیا تھا۔۱۹۶۵ء میں روزنامہ’انجام‘ میں ’’باتیں انشا جی‘‘ کے عنوان سے لکھتے رہے۔مطالعاتی مواد کے امور میں ابن انشا پاکستان میں یونیسکو کے نمائندے تھے۔سفرناموں، ترجموں اور شاعری پر مبنی تصنیفات اور تالیفات کا ایک وسیع ذخیرہ ابن انشا نے ہمارے ادب میں چھوڑا ہے۔۱۱؍جنوری۱۹۷۸ء کو ابن انشالندن میں اپنے خالق حقیقی سے جاملے۔ان کی تصانیف کے نام یہ ہیں: ’چاند نگر‘،’اس بستی کے اک کوچے میں‘(شعری مجموعے)، ’بلو کا بستہ‘(بچوں کی نظمیں)، ’دنیا گول ہے‘، ’آوارہ گرد کی ڈائری‘، ’اردو کی آخری کتاب‘(مزاح)، ’چلتے ہو تو چین کو چلیے‘، ’ابن بطوطہ کے تعاقب میں‘(سفرنامے)، ’سحر ہونے تک‘(ترجمہ روسی ناول)، ’انشا جی کے خطوط‘، ’نگری نگری پھرا مسافر‘۔ بحوالۂ:پیمانۂ غزل(جلد دوم)،محمد شمس الحق،صفحہ:205