غالب اور کلام غالب عالمی شہرت یافتہ ہیں ۔ان کی شاعری کی اہم خصوصیت ان کے متنوع مضامین او ر ان کو دیکھنے اور دکھانے کا مختلف نظریہ ہے۔ان کی شاعری اعلیٰ فکری و فنی خوبیوں سے مزئین اہم ہے۔ ان کے کلام میں عشق و محبت کے ساتھ کائنات اور مناظر قدرت کے حسن کا بیان بھی خوب ہے۔غالب اور کلام غالب پر تحقیقی و تنقیدی نوعیت کے کئی مطالعات منظر عام پر آچکے ہیں۔یہ سلسلہ ہنوز جاری ہے۔پیش نظر اسی سلسلہ کی ایک کڑی ہے۔جس کے متعلق خود مصنف ڈاکٹر محمد علی رقمطراز ہیں۔" غالب کی خدمت میں خراج عقیدت ضرور پیش کیا جائے خواہ غالب شناسوں کے لیے کوئی نئی بات پیش نہ کی جاسکے۔بہر صورت ہر غالب پسند پرلازم ہے کہ جس شاعر کے کلام کے ساتھ ایک زندگی گزاری ہو اس کے بارے میں گفتگو کی جائے۔"مصنف نے غالب شناسی کے لیے غالب کی جمالیات،غالب کا شعری مزاج،غالب ،دہلی اوررست خیز جائز،غالب و اقبال ایک تقابلی مطالعہ غالب اور انسانی مقدر، وغیرہ موضوعات کا انتخاب کیا ہے۔جس کا مطالعہ غالب اور کلا م غالب کو سمجھنے میں معاون ہے۔