یہ کتاب ان کی دیگر کتب کی طرح ہی صوفیانہ رنگ میں رنگی ہوئی ہے۔ واصف علی واصف کی طبیعت میں ایک صوفی با صفا موجود ہے جو انہیں اس جیسی تحریریں لکھنے پر مجبور کرتا رہتا ہے۔ اس کتاب میں ان کے چند مضامیں کو یک جا کر دیا گیا ہے جو ان کی وفات سے پہلے شایع ہو چکے تھے مگر کتابی شکل اختیار نہ کر سکے تھے۔ ان مضامین میں اخلاقیات ، سیرت، اسوہ، تصوف اور اد ب کا ایک اعلی نمونہ ہمیں دیکھنے کو ملے گا جیسا کہ ان کی دیگر کتب میں نظر آتا ہے ۔

واصف علی واصف ٭ 15 جنوری 1929ء پاکستان کے مشہور صوفی دانشور، شاعر، ادیب اور کالم نگار واصف علی واصف کی تاریخ پیدائش ہے۔ واصف علی واصف خوشاب میں پیدا ہوئے تھے۔ ان کے مکالموں اور گفتگو کے متعدد مجموعے اشاعت پذیر ہوچکے ہیں جو بے حد مقبول ہوئے ہیں۔ ان کی نثری تصانیف میں کرن کرن سورج، قطرہ قطرہ قلزم، حرف حرف حقیقت، دل دریا سمندر، بات سے بات، دریچے، ذکر حبیب، مکالمہ اور گفتگو شامل ہیں جبکہ ان کے شعری مجموعے شب چراغ، شب زاد اور بھرے بھڑولے کے نام سے اشاعت پذیر ہوئے ہیں۔ واصف علی واصف 18 جنوری 1993ء کو لاہور میں وفات پاگئے اور لاہور ہی میں میانی صاحب کے قبرستان میں آسودۂ خاک ہوئے۔