شاعر مشرق علامہ اقبال کی حیات ،شخصیت و کلام پر بہت سی تحقیقی وتنقیدی کتابیں لکھی گئی اور لکھی جاتی رہیں گی۔زیر نظر کتاب اسی سلسلہ کی ایک کڑی ہے۔جس میں مولانا عبدالسلام ندوی نے ڈاکٹر اقبال کے مفصل سوانح حیات ،ان کی تصنیفات ،فلسفہ اور کلام پر تنقیدی جائزہ پیش کیا ہے۔اقبال کا کلام اگرچہ زیادہ تر فلسفیانہ ،صوفیانہ ،مذہبی ،سیاسی او رقومی مسائل پر مشتمل ہے۔لیکن یہ مسائل شاعرانہ طرز و اسلوب میں بیان کیے گئے ہیں۔اس لیے اس کتا ب میں مصنف نے فلسفیانہ اور سیاسی مسائل سے پہلے ان کی ذات کو صرف ایک شاعر کی حیثیت سے پیش نظر رکھا ہے اور مختلف عنوانات میں ان کی شاعرانہ حیثیت کو زیادہ مکمل صورت میں نمایاں کیا ہے۔ فلسفیانہ اور صوفیانہ حقائق و مسائل پر بھی مصنف نے جو کچھ لکھا ہے ،اس میں بھی اقبال کو بحیثیت شاعر ہی اولیت دی ہے۔اس کے لیے مصنف نے اقبال کے کلام سے غزلیات، قطعات اور نظموں سے ایسی مثالیں پیش کی ہیں۔جن میں شاعری اور فلسفہ کا حسین امتزاج ہے۔بہرحال اس کتاب میں علامہ اقبال کی حیات اور کارناموں کے ہر حصہ کا احاطیہ کرنے کی کوشش کی گئی ہے۔اسی مناسبت سے اس کتاب کا نام "اقبال کامل"رکھا گیا ہے۔