افتخارعارف کا تعلق پاکستان سے ہے۔ ادبی دنیا میں اعلیٰ مقام رکھنے کے علاوہ ایڈمنسٹریشن کی اعلیٰ صلاحیت کے مالک ہیں۔ انہوں نے اپنی اس کتاب کی ابتدائیہ میں مکہ مکرمہ کے لئے جو اشعار کہے ہیں دل کو چھولینے والے ہیں۔ نعت نبی کے بعد "تعارف" کے عنوان سے رسول پاک کی شان و عظمت کو بتایا ہے۔ نعت و مناجات پر کتاب کا بڑا حصہ مشتمل ہے اور اس کے بعد کچھ غزلیں پیش کی گئی ہیں۔ "نذر اقبال" عنوان کے تحت علامہ اقبال کے بلند ذوق کا اعتراف پھر غالب کی شان میں دو مصرعے پڑھ کر دل خوش ہو جاتا ہے ۔آخر کتاب میں چند عزیز و احباء کی یاد میں اشعار پیش کیے گئے ہیں جن کے پڑھنے سے اپنوں سے قربت کا احساس موجزن ہو جاتا ہے۔ مجموعہ کے مطالعہ سے شاعر کی اعلیٰ صلاحیتوں کا اندازہ ہوتا ہے۔ ان کی شاعری میں حسن و معنویت اور شعروں کی تراکیب معیاری ہوتے ہیں۔ یہی وجہ ہے کہ قارئین میں افتخار عارف کی شاعری بہت پسند کی جاتی ہے ۔ ان کے یہاں اعلیٰ موضوعات کا انتخاب اور متناسب لب و لہجہ، اسلامی تلمیحات، واقعہ کربلا کو ہلکے رمزیہ اشاروں اور لطیف کنایوں میں اس طرح لیتے ہیں کہ سامنے کے بعض موضوعات میں بھی حسن و تازگی مترشح ہونے لگتی ہے ۔

نام افتخار حسین عارف اور تخلص عارف ہے۔ ۲۳؍مارچ ۱۹۴۲ء کو لکھنؤ میں پیدا ہوئے۔ بی اے ، ایم اے لکھنؤ یونیورسٹی سے کیا۔جرنلزم کا ایک کورس انھوں نے کولمبیا یونیورسٹی سے بھی کیا۔۱۹۶۵ء میں مستقل طور پر پاکستان آگئے اور ریڈیو پاکستان سے منسلک ہوگئے۔اس کے بعد افتخار عارف پاکستان ٹیلی وژن سے وابستہ ہوگئے۔ جب ٹیلی وژن میں پروگرام ’’کسوٹی‘‘ کا آغاز ہوا تو عبید اللہ بیگ کے ساتھ افتخار عارف بھی اس پروگرام میں شریک ہوتے تھے۔ یہ پروگرام بہت علمی اور معلوماتی تھا۔ ۱۹۷۷ء میں ریڈیو اور ٹیلی وژن سے استعفا دے کر بی سی سی آئی بینک، لندن سے وابستہ ہوگئے۔ اس کے بعد ڈائرکٹر جنرل اکادمی ادبیات پاکستان ،صدر نشین مقتدرہ قومی زبان اور چیرمین اکادمی ادبیات پاکستان کے عہدوں پر فائز رہے۔ افتخار عارف نے نظم ونثر دونوں میں طبع آزمائی کی ہے۔ ان کی تصانیف کے نام یہ ہیں : ’’مہر دونیم‘، ’حرف باریاب‘، ’بارہواں کھلاڑی‘، ’اقلیم ہنر‘، ’جہان معلوم‘، ’شہرعلم کے دروازے پر‘(نعت ،سلام ومنقبت)۔ ان کی علمی وادبی خدمات کے اعتراف میں ان کو’’آدم جی ایوارڈ‘‘،’’نقوش ایوارڈ‘‘، ’’صدارتی ایوارڈ برائے حسن کارکردگی‘‘، ’’ستارۂ امتیاز‘‘ اور ’’ہلال امتیاز‘‘ مل چکے ہیں۔ بحوالۂ:پیمانۂ غزل(جلد دوم)،محمد شمس الحق،صفحہ:357