زیر تبصرہ کتاب "جنگ بھنسا" صادق سردھنوی کا ناول ہے۔ یہ ناول اسلامی تاریخ کے ایک اہم حصہ کو پیش کرتا ہے، حضرت خالد بن ولید رضی اللہ تعالی عنہ جو عظیم المرتبت صحابی ہیں، ان کی شجاعت و بہادری اور میدان جنگ میں مقابلہ آرائی کی صلاحیت تاریخ کے صفحات پر عیاں ہے، ان کا مقابلہ مصر کے شہنشاہ بطلوس سے ہوتا ہے، اس جنگ کو جنگ بھنسا یا جذبہ جہاد کے نام سے جانا جاتا ہے، بھنسا مصر کے ایک زبردست قلعہ کا نام تھا، اس ناول میں جنگ بھنسا کی روداد بیان کی گئی ہے، اس کے پس منظر و پیش منظر سے واقف کرایا گیا ہے، صحابہ کی قربانیوں کو بیان کیا گیا ہے، ان کی شجاعت و بہادری اور جنگی تدابیر سے بخوبی واقف کرایا گیا ہے، حضرت خالد بن ولید رضی اللہ عنہ کی شجاعت و بہادری کا نقشہ کھینچا گیا ہے، اور ان کی جنگی بصیرت بھی واقعات کی روشنی میں عیاں کی گئی ہے۔ ناول میں احسن القصص کے عنوان سے حضرت یوسف علیہ السّلام کا قصہ بھی ذکر کیا گیا ہے، یہ تذکرہ نہر یوسفی کے ضمن میں ہے، ناول ضخیم ہے، اس کا قصہ دلچسپ اور انداز بیان خوب ہے، مطالعہ کیجئے تو کرتے چلے جائیے۔