حاجی شفیع اللہ شفیع  ؔبہرائچی ۔آپ شہر بہرائچ کے اپنے وقت کے نامورممتاز تاجروں میں شمار ہوتے تھے۔ آپ جگرؔ بسوانی کے شاگرد اورحضرت شوقؔ بہرائچی کے قریبی ساتھی تھے،اس کے ساتھ ساتھ کیفیؔ اعظمی صاحب سے بھی آپ کا تعلق رہا ۔کیفی ؔ کے بہرائچ کے ادبی ساتھیوں میں سے تھے۔آپ کے کئی مجموعہ کلام آپ کی حیات میں منظر عام پر آئے لیکن اب دستیاب نہیں ہے۔۲۰۱۵ء میں پہلے آپ کے پسرزادے جناب محمد فیض اللہ فیضؔ بہرائچی کے مجموعہ کلام ’’احساسات فیض‘ؔ‘‘ میں آپ کا دستیاب ہوا کلام شائع ہوا ۔۲۰۱۹ء میں آپ کا ایک مجموعہ کلام’’جذبات شفیعؔ ‘‘ کے نام سے منظر عام پر آیا جو آپ کی ایک قلمی بیاض کا سرمایہ تھا۔باقی بیاضیں دیمک کی نظر ہو گئی۔انجمن ریاض ادب بہرائچ کے خازن تھے۔آپ نے بہرائچ کے مشہور سنگم ہوٹل کی بنیاد رکھی جو ایک زمانے میں ادبی محفلوں کا اہم ترین مرکز تھا۔جہاں شہر اور ضلع کے ادیب ہر شام کو ایکجا ہو تے تھے۔