شبیر حسین خاں جوش ملیح آبادی اردو ادب کے نامور اور قادر الکلام شاعر تھے۔ آپ آفریدی قبیلے سے تعلق رکھتے ہیں۔ ہندوستان کی آزادی کی لڑائی میں جن قلمکاروں نے شانہ بہ شانہ کھڑے ہو کر شمع انقلاب کو اس وقت تک جلائے رکھا جب تک کہ آزادی حاصل نہ ہو گئی، ان قلم کے سپاہیوں میں جوش ملیح آبادی کا نام سر فہرست آتا ہے۔اس حوالے سے کنور نٹور سنگھ کہتے ہیں کہ "حضرت جوش ملیح آبادی ہمارے ملک کی جنگ آزادی کے سورما اور صف اول کے شاعر تھے۔ ٹیگور اور اقبال کے بعد نرالا ، ولاٹھول اور سبرامنیم بھارتی جیسے بڑے شاعر ہندوستانی عوام کے دلوں کی دھڑکن تھے اور جوش بھی اسی مرتبہ کے شاعر تھے۔‘‘جوش نے اپنی شاعری کے ذریعہ ایسا انقلاب برپا کیا کہ آپ "شاعر انقلاب"کے لقب سے مشہور ہو گئے ۔ جوش کی انقلابی سوچ و فکر کے نمونے ان کی شاعری میں جا بجا ملتے ہیں ،زیر نظر کتاب میں شاہد ماہلی نے جوش کی شخصیت اور ان کے فن کا تحقیقی جائزہ لیا ہے ،اور اردو ادب کے ممتاز محققین کے مضامین کو کتاب میں شامل کرکے جوش کے فن کو اور اجاگر کر دیا ہے۔