مولانا ابوالکلام آزاد کے علمی کارناموں سے متاثر ہوکر ذوق خالص کی راہنمائی میں جن حضرات نے قلم اٹھایا ان میں مالک رام کو ایک خاص اور اہم مقام حاصل ہے۔ اگر مالک رام کی مرتب کردہ مولانا آزاد کی تصنیفات اور مالک رام کے قلم سے ان کے اعزاز میں لکھے گئے مقالات کو سامنے رکھا جائے تو یہ بات واضح ہوجاتی ہے کہ مالک رام مولانا ابوالکلام آزاد کے معتقد نہیں بلکہ محقق ہیں۔مالک رام نے مولانا ابوالکلام آزاد پر کئی ایک مقالے بھی لکھے جس میں مولانا کی زندگی اور اُن کی تصانیف سے متعلق مواد موجود ہے۔ جون 1989ء میں مکتبہ جامعہ نئی دہلی نے ان تمام مقالات کو ایک کتابی شکل میں شائع کردیا اور اس کا نام "کچھ ابوالکلام آزاد کے بارے میں" رکھا۔ اس کتاب میں "پیش گفتار" کے عنوان سے 18 صفحات پر مشتمل ایک دیباچہ بھی شامل ہے جسے مالک رام نے یکم جون 1989ء کو تحریر کیا۔۔اس کتاب میں مندرجہ ذیل مضامین شامل ہیں۔ مولانا آزاد کی تاریخ ولادت، مولانا ابوالکلام آزاد (پہلے بیس سال) ،مولانا آزاد بحیثیت صحافی، مولانا آزاد کے خطبات، تحریک آزادی کی مذہبی بنیاد (افکار آزاد کی روشنی میں)، غالب اور ابوالکلام آزاد، غبارِ خاطر، تذکرہ، کچھ کرنے کے کام، ابوالنصر غلام یاسین آہ ۔یہ تمام وہ مضامین ہیں جو وقتا فوقتا ہندوستان کے مختلف رسائل و جرائد میں تزک و احتشام کے ساتھ شائع ہوتے رہے۔