زیر نظر کتاب دینی خطبوں پر مشتمل ہے۔ اس میں جمعہ کے خطبے، رمضان کے فضائل پر خطبے ، عید الاضحی کے علاوہ نکاح کے خطبے شامل ہیں۔ مجموعی طور پر کل ۱۲ خطبے ہیں اور ہر دو خطبہ کے درمیان متعلقہ موضوع پردلکش نظم پیش کی گئی ہے۔ کتاب کے اختتام پر " قطعہ تاریخ تالیف" سے اندازہ ہوتا ہے کہ ان تمام خطبوں کو 1294 ہجری میں لکھا گیا ہے۔ دو خطبوں کے درمیان جن نظموں کو پیش کرنے کا اہتمام کیا گیا ہے ،یہ تمام نظمیں دل کو چھو لینے والی ہیں۔ قاری پڑھتے ہوئے روحانیت کی ایسی دنیا میں پہنچ جاتا ہے جہاں پر ہر چیز ہیچ اور یادِ رب عزیز بن جاتی ہے۔ کتاب کے اختتام پر آداب جمعہ اور احکام جمعہ پر چند اہم باتیں بیان کی گئی ہیں ، جس کا پڑھنا یقیناً علم و معرفت میں اضافہ کرے گا۔

مولانا حسن رضا خاں نام، حسن تخلص۔ یکم اکتوبر ۱۸۵۹ء کو بریلی(یوپی) میں پیدا ہوئے۔ آپ احمد رضا خاں صاحب کے برادر خورد تھے۔ شعروسخن کا شوق ابتدائے عمر سے تھا۔ کچھ دنوں تک خود مشق سخن کرتے رہے۔ بعد ازاں داغ کو اپنا کلام دکھانے لگے ۔ ایک مدت تک رام پور میں رہ کر داغ سے فیض حاصل کرتے رہے۔ آپ کے دیوان غزلیات کے علاوہ بقیہ کل کتابوں اور رسالوں پر مذہبی رنگ غالب ہے۔ آپ نے سفر حج سے واپس آکر ۱۸؍ اکتوبر ۱۹۰۸ء کو بریلی میں داعئ اجل کو لبیک کہا۔