زیر تبصرہ کتاب "نئی تنقید نئے اقدار" علی احمد فاطمی کے مضامین کا مجموعہ ہے، اس کتاب میں نئی تنقید کے مفہوم اور صورت حال پر روشنی ڈالی گئی ہے، تجزیاتی تنقید کی خامیوں کو بیان کیا گیا ہے، ادب میں عصری سچائیوں کے بیان کی اہمیت پر اظہار خیال کیا گیا ہے، بڑے ادیب کی خوبیاں ذکر کی گئی ہیں، ترقی پسندی کے حقیقی مفہوم کو واضح کیا گیا ہے، عورتوں کے حقوق کے حوالے سے تاریخی گفتگو کی گئی ہے، عورتوں کی اصلاح و ترقی کے حوالے سے اردو میں موجود تخلیقات کا تعارف کرایا گیا ہے، اردو کے مسائل پر گفتگو کی گئی ہے، اور تلخ حقائق سے روبرو کرایا گیا ہے، مولوی عبدالحق نے ترقی پسند تحریک کو بلند مقام تک پہنچانے میں جو خدمات انجام دیں، ان کا تذکرہ کیا گیا ہے، کئی مضامین میں شعراء کے فن اور کلام پر گفتگو کی گئی ہے، ان کی شاعری کی خوبیاں و خامیاں بیان کی گئی ہیں، اور ساتھ ہی ان کی شاعری کے کسی خاص پہلو پر تفصیلی اور مدلل انداز میں روشنی ڈالی گئی ہے، ان مضامین میں نظیر اکبرآبادی، غالب، جوش، حسرت موہانی، وغیرہ شعراء شامل ہیں۔