زیرِ تبصرہ کتاب "نئے ڈرامے" پروفیسر محمد حسن کی مرتب کردہ ہے، اس میں مختلف ادباء کے گیارہ ڈرامے پیش کئے گئے ہیں، جو جدید ڈرامے کے تقاضوں کو پورا کرتے ہیں۔ کتاب کے شروع میں مرتب کا پیش لفظ ہے، جس میں ڈرامے کے فن اور ڈرامے کی پیش کش کے طریقوں پر تفصیلی گفتگو کی گئی ہے، پیشکش کتنی اہمیت کی حامل ہے، اور اس میں کوتاہی کتنی نقصان دہ ہوتی ہے، اس کو بھی بیان کیا گیا ہے، اس کے بعد دیباچہ ہے، جس کو مرتب نے ہی سپرد تحریر کیا ہے، اس میں شامل کتاب ڈراموں کی خوبیوں پر گفتگو کی گئی ہے، اس انتخاب میں شامل ڈرامے سماجی مسائل کی عکاسی کرتے ہیں، ان ڈراموں کے واقعات ہماری زندگی کی صورت حال کے عکاس ہیں، ان میں مافوق الفطری عناصر نہیں ہیں، ان کے کردار بھی فرشتے یا شیطان نہیں عام انسان ہیں، جن میں خوبیوں اور خامیوں کا امتزاج ہے، 'نقل مکانی' راجندر سنگھ بیدی اس مجموعہ کے بہترین ڈراموں میں سے ایک ہے، جو عزرا اور نفیس کی مکان تلاش کرنے کی تکالیف کو عیاں کرتا ہے، اور پھر ایک طوائف کے مکان میں رہنے اور حالات سے مجبور ہو کر اس پیشے کی طرف راغب ہونے کو بخوبی پیش کرتا ہے۔ 'جونک محل سرا' وغیرہ جیسے عمدہ ڈرامے بھی اس مجموعہ میں شامل ہیں۔