مولانا مودودی ؒ کی یہ کتاب یہ دراصل بر صغیر کے مسلم اسکولوں کے طلبا کے لیے تحریر کیا گیا نصاب تھا ، جو کہ اپنے سادہ اسلوب اور دلنشین طرزِ تحریر کے باعث بہت جلد مقبول ہوگیا اور دن بدن اس کی مقبولیت بڑھتی چلی گئی۔ یہ مختصر رسالہ خصوصیت کے ساتھ ان نوجوانوں کے لیے لکھا گیا ہے جو ہائی اسکول کی آخری جماعتوں یا کالج کی ابتدائی منزلوں میں تعلیم پاتے ہوں۔ ان کے علاوہ عام ناظرین بھی اس سے فائدہ اٹھا سکتے ہیں۔دعوتی اور تبلیغی مقاصد کے لیے بھی یہ ایک بہت مفید اور کارآمد کتاب ہے۔دین کو سمجھنے کے لیے اس کا مطالعہ بہت مفید ثابت ہوسکتا ہے۔ کتاب 7 ابواب پر مشتمل ہے۔ ہر باب کے کچھ ذیلی عنوانات ہیں۔ تقسیم ابواب کی تفصیل کچھ اس طرح ہے۔باب اوّل : اسلام،باب دوم : ایمان اور اطاعت،باب سوم:نبوّت،باب چہارم:ایمان مفصّل،باب پنجم : عبادات،باب ششم : دین اور شریعتاورباب ہفتم : شریعت کے احکام کے حوالے سے ہے ۔ اس کتاب کے انگریزی ، عربی ، فارسی ، بنگلہ ، سندھی ، پشتو ، گجراتی ، ہندی ، تامل ، سواحلی ،سنہالی ، مالاباری ، ڈینش ، پرتگالی ، ہائوسا ، فرانسیسی ، جرمن ، انڈونیشی ، ہسپانوی ، اطالوی ، جاپانی اور تھائی زبان میں تراجم کیےجاچلےہیں اور اس کے تراجم کا یہ سلسلہ تاحال جاری ہے۔