زیر نظر کتاب میں انشائیہ کی صنف سے روبرو کرانے کی سعی ہوئی ہے۔ انشائیہ نثری ادب کی ایک خاص صورت ہے، یہ اپنے موضوع اور اسلوب کے بموجب ایک مخصوص صنفی مقام کی مستحق ہے۔ سطحی طور پر اس کا تعارف یوں کرایا جا سکتا ہے کہ یہ مضمون کی ایک قسم ہے مگر سچ تو یہ ہے کہ انشائیہ کی حدیں متعین کرنا امر عسیر ہے۔ اس کتاب میں بڑی محنت و جانفشانی کے بعد متعدد انشائیوں کا انتخاب کرکے اس پر ایک معلوماتی اور دلچسپ مقدمہ لکھ کر یہ ظاہر کیا گیا ہے کہ اردو میں بھی کچھ اچھے انشائیے لکھے گئے ہیں اور ان انشائیوں کو مضمون، مقالہ، روداد ، اداریہ ، خاکہ ، رپوتاژ سے الگ رکھا جا سکتا ہے۔ غرض کتاب میں انشائیہ کی صنف پر بات ہوئی ہے اور چند انشائیے پیش بھی کیے گئے ہیں اور کوشش کی گئی ہے کہ انشائیہ کی اصلیت کو اجاگر کیا جا سکے ۔اس کے علاوہ اس کتاب میں ادبی اور غیر ادبی تحریروں کی شناخت کرائی گئی ہے اور فن و معیار کی اہم قدروں سے روشناس کرایا گیا ہے۔ کتاب میں مختلف مصنفین کے ۲۸ انشائیے ہیں ۔ان کے مطالعہ سے کتاب کا موضوع نکھر کر سامنے آجاتا ہے۔