کتاب کے مصنف ایک ایسی ہمہ جہت شخصیت کے مالک ہیں جنہوں نے زبان ، ادب اور تدریس کے شعبوں میں گہری علمیت اور بصیرت کے نقوش چھوڑے ہیں۔ ان کی اس کتاب میں اردو کی تاریخ اس طرح جمع کی گئی ہے کہ اردو کی تاریخ کے ساتھ ہی اس کے بولنے والوں کی تہذیب و معاشرت اور گفتار و کردار کا عکس دکھائی دینے لگتا ہے۔ کتاب کی زبان آسان اور عام فہم رکھی گئی ہے تاکہ اردو سے دلچسپی رکھنے والے افراد کو اسے سمجھنا دشوار نہ ہو۔ کتاب تین حصون میں منقسم ہے۔ پہلے حصے میں اردو کی ابتدا اور اس کی تدریجی ترقی کا ذکر ہے، اس میں شمالی و جنوبی ہندوستان کی خدمات پر روشنی ڈالنے کے ساتھ ہی یہ بھی بتایا گیا ہے کہ یہ زبان ماضی میں کن کن ناموں سے پکاری جاتی رہی ہے۔ دوسرا حصہ اردو نظم کے لئے مخصوص ہے۔ اس میں اصناف سخن کی تاریخ، شاعری کے اسلوب اور مشہور شعراء کے حالات پیش کیے گئے ہیں ۔ کتاب کا تیسرا حصہ نثر کے متعلق ہے ۔ پہلے نثر کی تاریخ بیان کی گئی ہے اور اس کے بعد نثر کی مختلف قسموں کا اجمالی تذکرہ ہوا ہے۔ اس کے علاوہ لسانیات اور انشائیہ پر بھی روشنی ڈالی گئی ہے۔ بوقت ضرورت تقاضۂ تشریح کو دیکھتے ہوئے کہیں کہیں پر فٹ نوٹ لگا دیا گیا ہے مگر اس کی ضرورت کم پیش آئی ہے۔