ترقی پسند ادبی تحریک کے موضوعات پر زیر نظر کتاب میں ہمہ جہت مباحث موجود ہیں۔ کتاب میں ایک طرح سے ترقی پسند تحریک کی پچاس سالہ خدمات کا احاطہ کیا گیا ہے۔ کتاب ایک ترتیب ہے جس میں مقتدر قلمکاروں کے مضامین شامل ہیں، جو تمام موضوعات کا احاطہ کرتے ہیں۔ کتاب چھ حصوں میں منقسم ہے۔ پہلے حصے میں افکارو آثار سے بحث کی گئی ہے۔ اس کے تحت تحریک ادب سے متعلق پانچ موضوعات پر روشنی ڈالی گئی ہے۔ دوسرا حصہ مسائل و مباحث پر ہے اور اس میں چار اہم متعلقہ موضوعات کو شامل کیا گیا ہے۔ تیسرا حصہ فکری سفر کے نشانات کے بارے میں ہے اور اس کے تحت چھ موضوعات کو جگہہ دی گئی ہے۔ چوتھا حصہ " جن دیاروں سے کارواں گذرا "کے عنوان سے ہے۔ اس کے تحت گیارہ موضوعات ہیں ۔ اس میں ان خطوں کا ذکر ہے جہاں ترقی پسند تحریک کو قوت ملی۔ پانچواں حصہ " عمر گذشتہ کی کتاب" افسانوی ادب، ڈرامہ ، شاعری وغیرہ پرمشتمل ہے۔ اس کے بعد طنز ومزاح، تنقید اور لسانی مسائل پر گفتگو کی گئی ہے اور آخری حصہ " ترقی پسند ادب کی وضاحتی کتابیات " کے عنوان سے ہے ۔اس میں چند اہم نکات پر بات ہوئی ہے۔