جلال الدین رومی جنہیں بسا اوقات مولانائے روم کے نام سے بھی جانا جاتا ہے، عالمی ادب کی تاریخ میں ایک ایسے نابغہ روزگار شخصیت کے طور پر جانے جاتے ہیں جن سے ادبی ذوق و شوق رکھنے والا شاید ہی کوئی قاری واقف نہ ہو۔ زیر نظر کتاب جس کے مصنف خلیفہ عبد الحکیم ہیں، رومی کے پرستاروں میں شامل ہیں۔ اس کتاب میں انہوں نے رومی کی تخلیقات کا جائزہ تماثیل و تشبیہات کے تناظر میں لیا ہے۔ میں کیا ہوں؟ مقصد حیات کیا ہے؟ زندگی کہاں سے آتی ہے اور کہاں جاتی ہے؟ خالق و مخلوق کا باہمی تعلق کس نوعیت کا ہے؟ یہ وہ سوالات ہیں جنہیں رومی نے اپنی تخلیقات میں بحسن و خوبی تلاش کرنے کی سعی کی ہے۔ ان سوالات سے جو نگارشات نکلیں، نیز یہ جس باریک اور گہری تمثیلات و تشبیہات سے ہو کر اپنے معانی و مفاہیم کا تعین کرتی ہیں، یہی اس کتاب کا موضوع ہے۔

خلیفہ عبدالحکیم  پاکستان کے نامور فلسفی، محقق، ماہر اقبالیات، مترجم اور مصنف خلیفہ عبدالحکیم یکم جولائی 1893ء کو لاہور میں پیدا ہوئے تھے۔ انہوں نے سینٹ اسٹیفنز کالج دہلی سے ایم اے (فلسفہ) اور ہائیڈل برگ یونیورسٹی سے ڈاکٹریٹ کی ڈگری حاصل کی تھی۔ قیام پاکستان کے بعد وہ ادارہ ثقافت اسلامیہ کے ڈائریکٹر کے عہدے پر فائز ہوئے۔ خلیفہ عبدالحکیم کی تصانیف میں افکار غالب، حکمت رومی، تشبیہات رومی، فکر اقبال اور داستان دانش کے نام سرفہرست ہیں۔ 30 جنوری 1959ء کو خلیفہ عبدالحکیم اپنے خالق حقیقی سے جاملے۔