زیر نظر کتاب رضاعلی عابدی کی دوتصانیف"پہلا سفر " اور "ہمارے کتب خانے" پر مشتمل ہے۔جس میں مصنف نے کچھ ترمیم و اضافے کے بعد یکجا کیا ہے۔" پہلا سفر"مصنف کے تیس سال پہلے اور تیس سال بعدکے سفر پر محیط ہے۔"ہمارے کتب خانے" ایک نایاب تصنیف ہے ۔جس میں قدیم اور نایاب کتابوں کا تعارف پیش کیا گیا ہے۔یہ سلسلہ سب سے پہلے بی بی سی لندن کی اردو سروس نے 1975 میں "کتب خانہ " کے عنوا ن سے نشر کیا تھا۔جس میں برطانیہ میں محفوظ اردو کی قدیم کتابوں کا تعارف پیش کیا گیا تھا۔یہ سلسلہ 140 ہفتوں تک چلا اور سامعین نے اسے بے حد پسند کیا۔اسی سلسلہ کی دوسری کڑی برصغیر کے کتب خانوں میں محفوظ کتابوں کا تعارف تھا۔جسے یہاں کتابی شکل میں یکجا کیا گیا ہے۔یہ دراصل قدیم کتابوں اور دستاویزات کو مٹنے سے بچانے کی ایک اہم کوشش ہے۔جس میں برصغیر کے کئی اہم کتب خانوں میں محفوظ کتابوں جس میں زیادہ تر اردو ،فارسی اور عربی کتابوں اور دستاویزات کے حوالے سے بات کی گئی ہے۔

رضا علی عابدی مشہور پاکستانی صحافی اور مصنف، 30 دسمبر 1935 کو ہندوستان کے شہر رڑکی میں پیدا ہوئے۔ 1950 میں اپنے اہل خانہ کے ساتھ کراچی ہجرت کرگئے اور وہاں سے لندن چلے گئے۔ بی بی سی (اردو) سے 1972 سے 2008 تک منسلک رہے۔  وہ اپنی کچھ ریڈیائی دستاویزی پروگراموں کے لئے بہت ممشہور ہیں جو کتابی شکل میں بھی موجود ہیں۔ ’’جرنیلی سڑک‘‘ جو گرانٹ ٹرنگ روڈ کے بارے میں ہے اور دریائے سندھ کے متعلق سفر نامہ ہے ’’شیردریا‘‘۔ اس کے علاوہ ان کی اور بھی متعدد کتابیں شائع ہوکر مقبول عام ہوچکی ہیں۔ انہوں نے بچوں کے لئے  بھی بہت سی دلچسپ کتابی لکھیں اور مرتب کی ہیں۔