زیر نظر "اردو کورس" ڈاکٹر علامہ اقبال کی مرتب کردہ کتاب ہے۔جو ساتویں جماعت کے طلبا کے لیے مرتب کی گئی ہے۔جس میں اس بات کا خاص خیال رکھا گیا ہے کہ علم ادب کے مضامین اس طرح جمع کئے ہیں کہ طلبا کو نئی معلوما ت حا صل ہونے کے ساتھ ساتھ اردو زبان سے دلچسپی بھی پیدا ہو۔اس کے علاوہ طلبا اردو کے انداز تحریر سےبھی واقف ہوجائیں گے۔مضامین کے انتخاب میں زمانہ ء حاضرہ کے تمام ضروریات کا خیال رکھا گیا ہے اور یہ کوشش بھی کی گئی ہے کہ مضامین ایسے دلکش اور پراثر ہیں کہ بچوں کی طبعیت خود بہ خود اردو زبان و ادب کی طرف راغب ہوجائے گی۔

حکیم احمد شجاع ٭ اردو کے مشہور انشا پرداز‘ ڈرامہ نگار‘ افسانہ نگار اور شاعر حکیم احمد شجاع کی تاریخ پیدائش  4 نومبر1896 ء ہے۔ حکیم احمد شجاع نے لاہور سے میٹرک کرنے کے بعد ایم اے اور کالج علی گڑھ سے ایف اے اور پھر میرٹھ کالج سے بی اے کیا اور شعبہ تعلیم سے وابستہ ہوگئے۔ 1920ء میں پنجاب اسمبلی سے منسلک ہوئے اور پھر اس اسمبلی کے سیکریٹری کے عہدے تک پہنچے۔ اس کے ساتھ ہی وہ 1948ء سے 1969ء تک مجلس زبان دفتری کے سیکریٹری بھی رہے اور ان کی رہنمائی میں ہزاروں انگریزی اصطلاحات کا اردو ترجمہ ہوا۔ حکیم احمد شجاع اردو کے صف اول کے ڈرامہ نگاروں میں شمار ہوتے ہیں۔ انہوں نے بہت سے افسانے بھی لکھے‘ ناول بھی تحریر کیا اور کئی فلموں کی کہانیاں بھی لکھیں۔ انہوں نے ایک ادبی رسالہ ہزار داستان اور بچوں کا رسالہ نونہال بھی نکالا۔ اپنی خود نوشت خوں بہا کے نام سے تحریر کی اور لاہور کے اندرون بھاٹی دروازے کی ادبی تاریخ لاہور کا چیلسی کے نام سے رقم کی۔ وہ قرآن پاک کی تفسیر بھی تحریر کررہے تھی جس کا نام افصح البیان رکھا گیا تھا مگر بدقسمتی سے یہ کام مکمل نہ ہوسکا اور صرف پانچ پاروں ہی کی تفسیر لکھی جاسکی۔ حکیم احمد شجاع نے 4 جنوری 1969ء کو لاہور میں وفات پائی اور میانی صاحب کے قبرستان میں آسودہ خاک ہوئے۔