"اردو مصدر نامہ" حفیظ الرحمن واصف کی کتاب ہے۔ اس کتاب میں اردو کے تقریبا تیرہ سو الفاظ کے مصادر، اس کے علاوہ تقریبا انیس سو مشتق الفاظ کو جمع کیا گیا ہے۔ اس کتاب کے مطالعے سے اردو میں استعمال ہونے والے الفاظ کے اصل مصادر تک رسائی ہوتی ہے کہ فلاں لفظ کی اصل کیا ہے۔ اور فلاں لفظ کہاں سے نکلا ہے اس کے اصل میں کون کون سے حروف شامل ہیں، اس کے علاوہ لفظ کی بنیادی شکل اور زبان کا علم ہوتا ہے کہ یہ لفظ کس زبان سے ماخوذ ہے۔ چنانچہ حروف تہجی کے اعتبار سے لفظوں کو مرتب کیا گیا ہے تاکہ کسی بھی لفظ تک رسائی میں آسانی ہو سکے۔ کتاب کے شروع میں مصنف کا لکھا ہوا ایک مبسوط عالمانہ مقدمہ بھی شامل ہے جس میں انھوں نے اردو کی وطنیت ، اردو کا سرمایہ لغت، اردو کا ابتدائی نقشہ ، عہد مغلیہ کا اردو بازار ، اردو کی ادبی رفتار، الفاظ کی قسمیں اور اردو رسم الخط، وغیرہ کا ذکر بڑے عالمانہ انداز میں کیا ہے۔