مصنف اردو ادب کی دنیا میں ایک اچھے قلمکار کی حیثیت سے متعارف ہیں۔ صحافت سے ان کا گہرا ربط ہے۔ اخبار " منصف" کے دہلی چیف آف بیورو رہ چکے ہیں۔ اسکے علاوہ ادبی مجلس کے سکریٹری رہنے کے علاوہ اعلی سرکاری عہدوں پر فائز رہے ہیں۔ ہندو پاک کے تعلیمی اداروں سے متعدد اعزازات حاصل کرچکے ہیں۔ ان کی یہ کتاب اردو صحافت اور صحافی کی تواریخ پر روشنی ڈالتی ہے اور یہ بتاتی ہے کہ اولین سیاسی صحافی کون تھے، برصغیر میں مطبوعہ اردو صحافت کی ابتدا کب ہوئی ،آزادی میں اردو صحافت نے کیا کردار ادا کیا، قومی یکجہتی کو فروغ دینے میں اس کا کیا کرداررہا ہے اور اس کے علاوہ ماضی اور حال کی صحافت میں کیا بدلاؤ آیا ہے ۔ نیز یہ بھی بتایا گیا ہے کہ برطانیہ جیسے یورپی ملک میں اردو صحافت کی حیثیت کیا ہے۔ ان اہم موضوعات پر بات کرتے ہوئے شواہد و دلائل کا خاص لحاظ رکھا گیا ہے اور آخر میں مصنف کا مکمل تعارف پیش کیا گیا ہے۔ کتابیات کے عنوان سے حوالہ جات کا ذکر ہے تاکہ تحقیق کرنے والے طلبا کے لئے اصل مراجع تک پہنچنا آسان ہو۔