زیر نظر کتاب میں ۱۷ ادیبوں کے انٹرویوز ہیں۔ ان انٹریوز میں تین قسم کے موضوعات مشترک ہیں۔ ایک تو نامور ادیبوں سے ان کی شخصیت اور فن کے متعلق مختلف زاویوں سے معلومات حاصل کی گئی ہیں۔ دوسرے ادب اور عصری مسائل کے حوالے سے نئی بحثیں چھیڑی گئی ہیں اور تیسرے ادبی تحریکات کو موضوع گفتگو بنایا گیا ہے۔ انٹرویوز کے ساتھ ہر ادیب کا مختصر تعارف اور ان کی تصنیفات کی تفصیل بھی درج کردی گئی ہے۔ نیز ان ممتاز ادبی و غیر ادبی شخصیات کے وضاحتی اور تردیدی خطوط بھی منسلک کئے گئے ہیں جو کسی انٹرویو کے رد عمل میں موصول ہوئے۔ ان انٹریوز میں سے بیشتر روزنامہ " جسارت" میں چھپنے کے بعد عالمی سطح پر موضوع بحث بن چکے ہیں ۔اسی مقبولیت کو دیکھتے ہوئے کچھ اضافے کے ساتھ ان انٹرویوز کو کتابی شکل دی گئی ہے۔ کچھ انٹرویو مختصر ہیں اور کچھ طویل ۔ دراصل یہ ادیب کے مزاج پر منحصر ہے۔ کچھ ادیب اپنی باتوں سے توجہ کھینچ لینے کا ہنر جانتے ہیں ۔ایسے ادیبوں کا انٹرویو طویل ہوگیا ہے جبکہ کچھ اپنی باتوں کو بنیادی نقطے پر مرکوز رکھتے ہیں تو فطری طور پر ان کا انٹرویو مختصر ہوجاتا ہے۔ پوری کتاب میں انٹرویوز سے قاری کو کئی نئی معلومات حاصل کرنے کی راہ ملتی ہے۔