زیر تبصرہ کتاب "زندگی میرے پیروں سے لپٹ جائے گی" تنویر انجم کی نثری نظموں کا مجموعہ ہے۔ تنویر انجم کراچی کی ممتاز شاعرہ ہیں، ان کے سات نثری نظموں کے مجموعے شائع ہوچکے ہیں، اور تنقید و تراجم کے میدان میں بھی ان کی خدمات اہم ہیں۔ زیر نظر کتاب میں 49 نظمیں شامل ہیں، جو مختلف موضوعات پر مشتمل ہیں، تانیثی مسائل پر گفتگو کرنا شاعرہ کا پسندیدہ موضوع ہے، اس مجموعہ میں بھی عورت کی آزادی، ترقی، خود مختاری، خود اعتمادی جیسے اہم پہلو نظموں میں بخوبی دیکھے جاسکتے ہیں۔ عورتوں کے لطیف احساسات و جذبات کی عکاسی کی گئی ہے، ماں بننے کا احساس بھی نمایاں ہے، عورتوں کے مسائل و مشکلات کو استعارتی انداز میں بخوبی بیان کیا گیا ہے، ہجرو وصال اور رومانیت بھی نظموں میں واضح طور پر نظر آتی ہے، عہد حاضر کے مسائل کی بھی بخوبی عکاسی کی گئی ہے۔ کتاب کی لفظیات بھی خوب ہے، معاشرے میں رائج زبان میں نظمیں کہی گئی ہیں، جن میں انگریزی الفاظ کی بھی بخوبی استعمال کیا گیا ہے۔

تنویر انجم پاکستان میں اردو کی ممتاز شاعرات میں سے ہیں۔ وہ ۱۹۵۶ میں کراچی میں پیدا ہوئیں اور۱۹۷۴سے شاعری کا آغاز کیا ۔ انہوں نے نثری نظم کی شاعرہ کی حیثیت سے ایک نمایاں مقام بنایا ہے ۔ اب تک ان کے نثری نظموں کے سات مجموعے شایع ہو چکے ہیں۔ ان دیکھی لہریں (۱۹۸۲)، سفر اور قید میں نظمیں (۱۹۹۲)، طوفانی بارشوں میں رقصاں ستارے (۱۹۹۷)، زندگی میرے پیروں سے لپٹ جاےٗ گی (۲۰۱۰)، نئے نام کی محبت (۲۰۱۳)، حاشیوں میں رنگ (۲۰۱۶) اورفریم سے باہر (۲۰۱۶) ۔ ان کی غزلوں کا ایک مجموعہ سروبرگ آرزو۲۰۰۱ میں شایع ہوا۔ ان کی منتخب نظموں کا ایک مجموعہ انگریزی تراجم کے ساتھ ۲۰۱۴ میں منظر عام پر آیا۔ ۲۰۲۰ میں ان کے سات مجموعوں سے نظموں کا ایک انتخاب نئی زبان کے حروف کے نام سے شائع ہوا۔ ان کی نظموں کے تراجم انگریزی اور دنیا کی دیگر زبانوں میں شائع ہوتے رہے ہیں۔ وہ عالمی ادب کے انگریزی سے اردو میں تراجم بھی کرتی رہتی ہیں اور تنقیدی مضامین بھی لکھتی ہیں۔
تنویر انجم نے کراچی یونیورسٹی سے انگریزی ادب میں ایم اے اور یونیورسٹی آف ٹیکساس آسٹن سے پی ایچ ڈی کیا۔ وہ کراچی میں رہائش پذیر ہیں اور شعبہٗ تدریس سے وابستہ رہی ہیں۔ آج کل حبیب یونیورسٹی میں پڑھاتی ہیں۔