اقبا ل مجید کا پہلا ناول "کسی دن" پیش نظر ہے۔ اس ناول کا موضوع ملک کے سیاسی ،سماجی ،معاشرتی اور تہذیبی مسائل ہے۔ اس ناول میں اقبال مجید نے تکنیکی انداز سے تین نسلوں کے بدلتے رویوں، سیاسی ،سماجی نظریات اور تہذیبی و ثقافتی اقدار کی پامالی کو ذہنی اختلاف کے ساتھ پیش کیا ہے۔اس ناول کے تین نسلوں کے تین اہم کردار قدرت اللہ،شوکت اللہ اور کموہیں، جو مختلف ادوار میں سیاسی اتار چڑھاؤ کے نمائندے بن کر سامنے آتے ہیں۔اس طرح ناول کا موضوع آج کی سیاسی، سماجی اور معاشرتی حقیقتوں کی تصویر کشی ہے۔ جس میں اقلیتی کردار اور مسلمانوں کے مسائل کی حقیقی عکاسی کی ہے۔ "کسی دن" میں اول تا آخر ہر کردار کسی نہ کسی خوف کے سائے میں زندگی گذاررہاہے۔جس طرح آج کا مسلمان سیاسی رسہ کشی میں انجانے خوف میں مبتلا نظرآتا ہے۔ اس طرح یہ ناول کسی سیاسی دور کی تاریخ نہیں بلکہ دور حاضر کی مفاد پرست سیاست کا نوحہ ہے۔جسے اقبال مجید نے اپنے منفرد اور دلکش انداز بیان سے مزید دلچسپ بنادیا ہے۔