aa ke mujh tak kashti-e-mai saqiya ulTi phiri

aa ke mujh tak kashtī-e-mai sāqiyā ulTī phirī

aaj kyā naddī bahī ulTī havā ulTī phirī

aate aate lab par āh-e-nā-rasā ulTī phirī

vo bhī merā hī dabāne ko galā ulTī phirī

muḌ ke dekhā us ne aur vaar abruoñ kā chal gayā

ik chhurī sīdhī phirī aur ik zarā ulTī phirī

lā sakā nazzāra-e-ruḳhsār-e-raushan kī na taab

jā ke ā.īne pe chehre kī ziyā ulTī phirī

rāst-bāzoñ hī ko piisā āsmāñ ne raat din

vā-e-qismat jab phirī ye āsiyā ulTī phirī

jo baḌā bol ek din bole the pesh aayā vahī

gumbad-e-gardūñ se Takrā kar sadā ulTī phirī

rizq khā kar ġhair kī qismat kā zambūr-e-asal

tū ne dekhā halq tak jā kar ġhizā ulTī phirī

tū satā.ish-gar hai us kā jo hai terā mad.h-ḳhvāñ

ye to ai mushfiq zamīr-e-marhabā ulTī phirī

jis par aa.ī thī tabī.at kī usī ne kuchh na qadr

jins-e-dil mānind-e-jins-e-nāravā ulTī phirī

yā to kushī Dūbtī thī yā chalī sāhil se duur

vaa.e nākāmī phirī bhī to havā ulTī phirī

girne vaalā hai kisī dushman pe kyā tīr-e-shahāb

āsmāñ tak jā ke kyuuñ āh-e-rasā ulTī phirī

jī gayā maiñ us ke aa jaane se dushman mar gayā

dekh kar iisā ko bālīñ par qazā ulTī phirī

mar gayā be-maut maiñ āḳhir ajal bhī duur hai

kūcha-e-qātil kā batlā kar patā ulTī phirī

hijr kī shab mujh ko ulTī saañs lete dekh kar

ek hī dam meñ vahāñ jā kar sabā ulTī phirī

hai mirā vīrāna-e-ġham 'nazm' aisā haul-nāk

mauj-e-sail aa.ī to le kar boriyā ulTī phirī

aa ke mujh tak kashti-e-mai saqiya ulTi phiri

aaj kya naddi bahi ulTi hawa ulTi phiri

aate aate lab par aah-e-na-rasa ulTi phiri

wo bhi mera hi dabane ko gala ulTi phiri

muD ke dekha us ne aur war abruon ka chal gaya

ek chhuri sidhi phiri aur ek zara ulTi phiri

la saka nazzara-e-ruKHsar-e-raushan ki na tab

ja ke aaine pe chehre ki ziya ulTi phiri

rast-bazon hi ko pisa aasman ne raat din

wa-e-qismat jab phiri ye aasiya ulTi phiri

jo baDa bol ek din bole the pesh aaya wahi

gumbad-e-gardun se Takra kar sada ulTi phiri

rizq kha kar ghair ki qismat ka zambur-e-asal

tu ne dekha halq tak ja kar ghiza ulTi phiri

tu sataish-gar hai us ka jo hai tera madh-KHwan

ye to ai mushfiq zamir-e-marhaba ulTi phiri

jis par aai thi tabiat ki usi ne kuchh na qadr

jins-e-dil manind-e-jins-e-narawa ulTi phiri

ya to kushi Dubti thi ya chali sahil se dur

wae nakaami phiri bhi to hawa ulTi phiri

girne wala hai kisi dushman pe kya tir-e-shahab

aasman tak ja ke kyun aah-e-rasa ulTi phiri

ji gaya main us ke aa jaane se dushman mar gaya

dekh kar isa ko baalin par qaza ulTi phiri

mar gaya be-maut main aaKHir ajal bhi dur hai

kucha-e-qatil ka batla kar pata ulTi phiri

hijr ki shab mujh ko ulTi sans lete dekh kar

ek hi dam mein wahan ja kar saba ulTi phiri

hai mera virana-e-gham 'nazm' aisa haul-nak

mauj-e-sail aai to le kar boriya ulTi phiri