aankhon se maine chakh liya mausam ke zahr ko

āñkhoñ se maiñ ne chakh liyā mausam ke zahr ko

lekin vajūd sah na sakā us ke qahr ko

pheñkā thā kis ne sañg-e-havas raat ḳhvāb meñ

phir DhūñDhtī hai niiñd usī pichhle pahr ko

miTTī ke sab makān zamīñ-doz ho ga.e

naqshe meñ ab talāsh karo apne shahr ko

dariyā-e-shab kā TuuT gayā hai sukūt aaj

muddat ke baa'd dekh ke kirnoñ kī nahr ko

saa.e ke saath vaqt ke dauḌā vo der tak

palkoñ meñ phir chhupā liyā lamhoñ ke qahr ko

paimāna-e-gulāb ko hoñToñ se chuum kar

muTThī meñ qaid kar liyā ḳhushbū kī lahr ko

aankhon se main ne chakh liya mausam ke zahr ko

lekin wajud sah na saka us ke qahr ko

phenka tha kis ne sang-e-hawas raat KHwab mein

phir DhunDhti hai nind usi pichhle pahr ko

miTTi ke sab makan zamin-doz ho gae

naqshe mein ab talash karo apne shahr ko

dariya-e-shab ka TuT gaya hai sukut aaj

muddat ke ba'd dekh ke kirnon ki nahr ko

sae ke sath waqt ke dauDa wo der tak

palkon mein phir chhupa liya lamhon ke qahr ko

paimana-e-gulab ko honTon se chum kar

muTThi mein qaid kar liya KHushbu ki lahr ko