aabla-pa koi guzra tha jo pichhle san mein

ābla-pā koī guzrā thā jo pichhle san meñ

surḳh kāñToñ kī bahār aa.ī hai ab ke ban meñ

dekhnā rañg-e-badan yaar ke pairāhan meñ

chāñdnī duudh sī chhiTkī hai mire āñgan meñ

dekhnā dīda-varo āmad-e-tūfān to nahīñ

Tapkī hai dard kī ek buuñd mire dāman meñ

maiñ ham-āġhosh-e-sanam thā magar a pīr-e-haram

ye shikan kaise paḌī aap ke pairahan meñ

kuchh na kuchh aaj asīroñ ne kahā to hai zarūr

ek ik gul se lipaTtī hai sabā gulshan meñ

sahal itne bhī nahīñ ai sitam-ījād ki ham

thaam lete haiñ garebān divāne-pan meñ

sar taslīm nahīñ bāzū-e-qātil kā javāb

āḳhirash maare ga.e ḳhud bhī masīhā an meñ

jā rahe ho to zarā dekhnā tum bhī 'majrūh'

merī āñkheñ vahīñ zindāñ ke kisī rauzan meñ

aabla-pa koi guzra tha jo pichhle san mein

surKH kanTon ki bahaar aai hai ab ke ban mein

dekhna rang-e-badan yar ke pairahan mein

chandni dudh si chhiTki hai mere aangan mein

dekhna dida-waro aamad-e-tufan to nahin

Tapki hai dard ki ek bund mere daman mein

main ham-aghosh-e-sanam tha magar a pir-e-haram

ye shikan kaise paDi aap ke pairahan mein

kuchh na kuchh aaj asiron ne kaha to hai zarur

ek ek gul se lipaTti hai saba gulshan mein

sahal itne bhi nahin ai sitam-ijad ki hum

tham lete hain gareban diwane-pan mein

sar taslim nahin bazu-e-qatil ka jawab

aaKHirash mare gae KHud bhi masiha an mein

ja rahe ho to zara dekhna tum bhi 'majruh'

meri aankhen wahin zindan ke kisi rauzan mein