aafat shab-e-tanhai ki Tal jae to achchha

aafat shab-e-tanhā.ī kī Tal jaa.e to achchhā

ghabrā ke jo dam aaj nikal jaa.e to achchhā

o jān-e-hazīñ jaanā hai ik din tujhe āḳhir

ab jaa.e to behtar hai ki kal jaa.e to achchhā

jhukvā diyā sar zo.af ne qātil ke qadam par

talvār agar us kī ugal jaa.e to achchhā

behtar nahīñ hai sūrat-e-jānāñ kā tasavvur

dil aur kisī shai se bahal jaa.e to achchhā

ik sil hai kaleje pe nahīñ ruuh badan meñ

chhātī kā pahāḌ aah pe Tal jaa.e to achchhā

dīvāna abas shahr kī galiyoñ meñ hai barbād

majnūñ kisī jañgal ko nikal jaa.e to achchhā

o ātish-e-dil phūñk de tan ashk bahā de

bah jaa.e to behtar hai ye jal jaa.e to achchhā

har martaba Dasne ke irāde meñ hai vo zulf

azhdar ye agar mujh ko nigal jaa.e to achchhā

phir ruknā hai dushvār ye jab aa.ī to aa.ī

aise meñ tabī.at jo sambhal jaa.e to achchhā

tābūt mirā tham ke uThāo mire yaaro

vo bhī kaf-e-afsos jo mal jaa.e to achchhā

ai 'rind' milo yaar se yā haath uThāo

jhagḌā chuke har shab kā ḳhalal jaa.e to achchhā

aafat shab-e-tanhai ki Tal jae to achchha

ghabra ke jo dam aaj nikal jae to achchha

o jaan-e-hazin jaana hai ek din tujhe aaKHir

ab jae to behtar hai ki kal jae to achchha

jhukwa diya sar zoaf ne qatil ke qadam par

talwar agar us ki ugal jae to achchha

behtar nahin hai surat-e-jaanan ka tasawwur

dil aur kisi shai se bahal jae to achchha

ek sil hai kaleje pe nahin ruh badan mein

chhati ka pahaD aah pe Tal jae to achchha

diwana abas shahr ki galiyon mein hai barbaad

majnun kisi jangal ko nikal jae to achchha

o aatish-e-dil phunk de tan ashk baha de

bah jae to behtar hai ye jal jae to achchha

har martaba Dasne ke irade mein hai wo zulf

azhdar ye agar mujh ko nigal jae to achchha

phir rukna hai dushwar ye jab aai to aai

aise mein tabiat jo sambhal jae to achchha

tabut mera tham ke uThao mere yaro

wo bhi kaf-e-afsos jo mal jae to achchha

ai 'rind' milo yar se ya hath uThao

jhagDa chuke har shab ka KHalal jae to achchha